媽呀！好亂呀！吳岱融唱歌冧完老婆 轉頭亂槍掃射鬧人「臭X」
因為「鷲哥」一角聲名大噪的吳岱融近期曝光率都幾高，晚晚都在《乘勝狙擊》見到他，又是做大奸大惡，同樣入型入格，高度搶眼成為網民的話題。話咁快，昨晚《乘勝狙擊》就來到大結局，不過完結之前，吳岱融首先出現在閃光彈節目《1+1的幸福》，與相愛22年的太太鍾慧冰分享相知經歷，講到老婆在自己最低谷時不離不棄，讓鷲哥大為感動，決心一心一意愛對方，仲話：「只有一息尚存，都會一心一意對佢好。」還即場唱費玉清的《一剪梅》表愛意，感謝太太真心愛錫自己，冧到太太當場淚崩。
吳岱融其後還講到：「有時女孩子人有三急，去廁所唔方便，我就會好傷心，點解我冇一架車可以接佢呢？」表達出面對老婆，有最好就會給最好的意思。網民眼看吳岱融一身鷲哥Look，架起眼鏡後卻變得柔情，第一時間說的竟不是「好幸福」，而是：「睇唔慣鷲哥咁柔情，有啲接受唔到。」，更講笑話：「睇完總會覺得佢返到屋企係咁發脾氣。」，看來高天鷲的形象已深入民心。此外，還有大讚吳岱融唱歌幾好聽，「識震音」。
不過話口未完，做完《1+1的幸福》，轉頭就見到吳岱融在《乘勝狙擊》入面「回復魔性」。劇中，眼見前妻要再婚，飾演蔣天龍的吳岱融即刻眼火爆，現任妻子呂珊上前慰問，可是吳岱融當下火遮眼，大鬧對方是「臭X」。咦？乜咁熟嘅？「臭X」咪就係《巨輪2》鷲哥講嘅對白囉！咁...我到底睇緊邊套呀？
發完火，仲有下文。吳岱融殺到前妻婚禮，用機關槍失控掃射，射極都仲有子彈！最後仲射死埋前妻，網民講笑：「呢個先係鷲哥！」劇情高潮迭起新奇有趣，吳岱融返到屋企避風頭，老婆呂珊被鬧「臭X」怒羞成惱，又不忿自己親生仔畀「瘋狂老竇」侮辱，眼見吳岱融中刀，忍不住插多幾下，這個畫面非常有潛力。
高天...唔係，蔣天龍就咁死咗。但網民就覺得8點半見到鷲哥甜甜蜜蜜，轉頭就見到他喪心病狂，變化太大接受不到，實在太重口味，同時分不清誰是真﹒鷲哥。太Sweet又唔慣，太瘋狂又接受不了，網民真係好矛盾！接下來要見鷲哥的時間要到3月13日播放的《我瞞結婚了》，做黃浩然爸爸、金鋪老闆，名叫張天虎。又係天字輩？留名等睇「臭X」再現！