謝霆鋒主持的內地美食真人騷《百姓的味道》，新一站來到貴州，同行嘉賓是美女楊超越，當地最出名是出產靚米，謝霆鋒和楊超越亦唔執輸，親身試下落場耕田，算是體驗當地人的生活，而霆鋒除了出名Chok，亦擅長煮番幾味，在節目中他會大顯身手，炮製一道港人熟悉的蕃茄豬扒飯，仲學足土耳其廚神Salt Bae的招牌撒鹽手勢，Chok出宇宙。

謝霆鋒曾在主持《十二道鋒味》時，烹調一道威靈頓牛排，技驚四座，成為城中熱話，之後他還發揮創意，包括用衣架晾意大利粉，又用晾衫架夾雞翼，仿如天才小廚師。來到《百姓的味道》，霆鋒試過當地的米飯後，決定炮製一道靈感來自港式蕃茄焗豬扒飯的菜式，只見霆鋒將豬扒炸熟，然後調配好醤汁，又用當地的米飯煮了一個蛋炒飯底，此時霆鋒學足土耳其廚神Salt Bae的撒鹽手勢，又加上了大堆芝士，由霆鋒出品的菜式當然不會平凡，節目中他出動火槍，燒到芝士進入半溶狀態，終於大功告成，再跟楊超越一起分享美食，隔住個Mon都睇到流口水。