專訪|Anson Lo個性力求完美 唔怕受壓:未到完整一刻都會好panic

撰文:鄺鈺瑩
出版:更新:

Anson Lo(盧瀚霆)去年以《Megahit》首奪叱咤十大,這對認為做跳唱歌手是難事的他來說,如同一劑強心針。踏入2022年,繼續在跳唱路上尋求突破,新歌《Mr. Stranger》以EDM曲風唱出陰暗一面,配上貴氣吸血鬼造型。追求極致的同時,壓力再次來襲,連他亦笑言:「自己有呢個堅持,其實係一個坑……」

到目前為止,有一半的solo歌都是用英名歌,Anson Lo笑言只係純粹巧合:「歌名我唔會俾太多特別意見,因為歌名同份詞都係直接掛勾,要尊重返填詞人。」

同是跳唱歌,《Megahit》感覺鮮明、派對,而《Mr. Stranger》雖然節奏明快,但走暗黑風格,新曲的概念與造型全是Anson Lo的想法:「因為成日覺得做跳唱歌可以表達嘅意思好少,冇理由用一首bomb bomb快歌去講悲傷嘅戀愛故事,所以好多時做快歌都要有較為強勢嘅主題,今次講一啲自己真正嘅內心感受,即係到底我呢幾個經歷緊啲咩、最大壓力來源係能否滿足觀眾同神徒嘅期望、我試新嘢大家又能否接受,所以2022年第一首歌做得比較personal。」

Anson Lo話平日都有戴color con,但今次對紅色隱形眼鏡過厚,加上長時間拍攝,令佢十分辛苦。

任性造型 珍貴額頭

新歌造型曝光後,神徒洗版式留言「想俾你吸晒啲血」足見Anson Lo的任性其實並不任性。「因為好多神徒都講過想睇吸血鬼呢個主題喺我身上會係點,咁不如今次正式去做。」寵粉並非得個「講」字,為了似模似樣,拍攝MV前參考了不少吸血鬼的造型:「好唔好睇見智見仁,但我今次都試咗新髮型,同埋因為對隱形眼鏡好厚,又戴好長時間,所以真係好唔舒服,但感覺好鮮明。」向來嚴守額頭的Anson Lo,在MV中所出的讓步,他笑言已是極大的進步:「之前係連少少額頭都唔想比人睇到,但而家會慢慢披露,有生之年都應該會all back一次。」

Anson Lo並沒有因為《Megahit》的成功而原地踏步。(資料圖片),

自揭陰暗一面

《Mr. Stranger》由王樂儀填詞,講述撕開自身鮮為人知的黑暗面時,要如何擁抱自身這種缺陷美。Anson Lo認為每個人對黑暗面的定義都有所不同,平日予人斯人、正能量的他,會擔心大家能否接受他懶惰、隨性、有脾氣的一面:「因為2021年係好開心的一年,多咗好多唔同層面嘅觀眾認識Anson Lo,但隨之而來嘅係壓力,因為每個人都有既有嘅期望,所以呢首歌係想抒發自己喺形象上嘅壓力。」《Mr. Stranger》是《Megahit》後的派台歌,或許有不少人期待同樣的風格、 甚至想再一次Uh-Oh Uh-Oh,但Anson Lo卻懂得見好就收。「自己唔想做同一樣嘢,質素上每次都想帶到新鮮感俾觀眾睇,其實呢個先係最大壓力,自已有呢份堅持,其實係一個坑。今次首先係諗到黑暗,但《EGO》時已經試過,要點先令大家分到兩首歌嘅不同之處,呢個就係質素上嘅最大壓力。」

MAMA獎終於由韓國空運到港,Anson Lo與家人分享喜悅。(IG圖片)

教母見MAMA獎眼濕濕

訪問中,Anson Lo不止一次提及壓力,問到會否因而忽略了享受的部份,他認真地解釋:「練舞一百次我都未必完全享受,我自己性格係咁,每次一樣嘢ongoing 時就會好繃緊、會想件事好,未到完整一刻都會好panic。你問我有冇享受,係有嘅,拍mv時我係享受、唱live時我係享受、電影roll 機我係享受,而預備時所面對嘅壓力係承受到,因為咁先會有要求、先想做得好,太輕鬆都未必係好事。」去年歌影視全面發展的同時,背後承受了不少壓力,幸好付出與收入成正比,在韓國音樂頒獎典禮MAMA上,獲「最佳新人亞洲歌手」獎,日前獎座終於空運抵港,第一個感覺係十分重手!「喺公司拆嗰下其實係開心,但最感動係遞俾嗲哋、媽咪嗰陣,嗲哋係興奮,媽咪係有少少眼濕濕,因為佢向來都唔會太講自己感受,見到佢眼濕濕好似終於做到一張成績表,可以令父母放心,上次自己嘅行程咁密都係值得。」

《大叔的愛 》去年大受歡迎,有傳將原班人馬拍攝新劇,Anson Lo回答得十分保守:「上年好開心,因為大家都鍾意睇我做戲,呢個對於演員Anson Lo嚟講係好感動,希望大家可以同我一齊耐心等候。」
+8

服裝:Marc Jacobs, Giuseppe Zanotti

Makeup:Rainbow Chung @Annie G. Chan Makeup Centre

Hair:Denny ku @CHIC Private I Salon

你可能感興趣