熊黛林續任醫美代言人 索爆身形全靠戒宵夜:肚餓睇人哋食嘢嘅片

撰文:陳栢宇
出版:更新:

熊黛林(Lynn)再度獲邀擔任醫學美容中心perFACE代言人,早前於影樓拍攝了一系列宣傳照,穿上多套以白色為主調的服裝,大騷婀娜索爆身形,究竟Lynn如何保持完美身段?她笑說:「以前有大Job都會做Gym、減肥,因為呢輪太忙喇,媽咪又返咗南京同埋屋企又少咗個工人,兩個女又好黐我,我所有嘢都鍾意落手落腳做,所以好忙。我連減肥做Gym練下腹肌都唔得,可能平時湊B嘅時候已經鍛鍊咗,當做運動,做番運動個人會健康啲、舒服啲。」

+1

原來Lynn也有一些瘦身小秘技,她笑說:「因為之前夜瞓,所以我有食宵夜嘅習慣,生完之後身體係有少少唔同嘅,例如以前夜晚食幾多都唔會肥,生完之後,食得太飽會胃酸倒流,又會肥啲,真係唔同,所以真係要戒,唔食宵夜,當肚餓嘅時候唔好自己食,要睇人哋食,睇人哋食嘢嘅片,見到好開心就等於食咗,好過癮!哈哈……」要內外兼顧,除了節食,心態上也重要,Lynn說:「如果成日諗啲唔開心嘅嘢,會好攰,夜晚又瞓唔着,瞓唔着皮膚會唔好,又有黑眼圈,對身體唔好,係惡性循環嚟嘅。其實個人諗開啲,會瞓得好啲,皮膚靚啲,精神又好啲,係唔同嘅。」

熊黛林索爆身形原來全靠戒宵夜。

曾經嘗試迷失的感覺,Lynn認為目前已找回真正的自己,她說:「之前因為BB細個,我都希望親自照顧佢哋,所以唔會有咁多時間去做自己嘢,要困喺屋企,包括夜晚出去食飯都唔會,冇乜私人生活,現階段囡囡開始返學,我開始有番自己私人空間,雖然返學只係得兩、三小時,我會趁呢段時間去做下Facial、做下機、做運動,買下自己嘅嘢,修身扮靚靚,做番自己做女嘅嘢,我都已經好享受,甚至乎趁呢啲時間出去做嘢,好開心!唔做嘢好似同社會脫咗節,之前兩、三年有少少冇自信,出番嚟工作,搵番啲自信!」

熊黛林非常緊張拍攝效果。

今年Lynn拍了多套電視劇,又接拍了多個廣告,要家庭事業兼顧,老公也十分支持,她說:「自從我返內地工作,返到嚟我老公問我係咪真係開心?做家庭主婦個人真係唔係咁開心,因為慣咗工作,之前出去做嘢,囡囡都會喊住話好掛住我,話唔想我出去做嘢,佢哋而家懂事,我會教佢哋每個人都要工作,呢個係一個人喺社會嘅價值嚟嘅,唔可以叫人養你一世,要同佢哋講道理,媽咪做緊好開心嘅工作。其實屋企點都係放喺第一位,自己盡量都想平衡,工作需要擺喺好前嘅,未遇到好大衝突,不過如果真係要太長時間離開屋企,就唔得。」