黃嘉樂8.19娶攝影師江惠賢 感激未婚妻落手籌備婚禮：都七七八八
撰文：吳子生
出版：更新：
黃嘉樂今日（25/6）現身中環出席好友陳健洪健身中心新店開張。提到上月向拍拖5年的攝影師女友江惠賢（Samantha）求婚成功，婚禮定8月19日舉行，嘉樂接受《香港01》訪問時表示：「其實婚禮準備都七七八八，而喺我拍緊《法言人》嘅時候，我未婚妻都安排好晒大部份嘅嘢，其實我個心裡面係好感激佢。相反我哋都密切關注而家個疫情走勢，希望唔會有咩大改變，其實我哋係擔心緊個防疫措施嘅問題。而當日會喺酒店度行禮簽紙擺酒一日搞點晒。」
黃嘉樂與圈外女友江惠賢8月19日正式舉行婚禮。（葉志明攝）
被問到會否婚後極速造人？嘉樂笑言：「呢個要睇自己當時嘅工作狀況啦，因為要有工作有收入先可以養妻活兒，咁所以希望大家畀多啲嘢我做，哈哈！（太太鍾唔鍾意小朋友？）太太係鍾意小朋友嘅。但大家都想婚後先享受下二人世界先嘅，預期兩年後先造人。」