黃金萬両｜朱智賢首次拍古裝劇熱到底褲濕晒：啲汗流落小腿度

朱智賢今日（13/7）現身電視城古裝街出席無綫賀歲喜劇《黃金萬両》開鏡拜神儀式。朱智賢透露首次拍古裝劇便嘗痛苦滋味：「其實我想講嘅係，喺咁熱嘅天氣拍古裝劇，啲底衫褲真係會濕晒。喺我拍緊嘅時候，我係感覺到大髀啲汗係流到落去小腿度，係搞到成腳都濕晒。而本身自己唔係大汗嘅人嚟，我見到自己咁樣，我都覺得好核突。但當我除衫嘅時候我仲驚，成件衫係濕晒，仲要水滴滴。到我還衫俾服裝嘅姐姐嘅時候，我都係咁講唔好意思，而服裝姐姐就話我咁嘅情況已經係好好。咁所以我終於感受到夏天拍古裝劇嘅威力。」

朱智賢透露在酷熱天氣下拍古裝劇一日飲超過2公升水。（陳順禎攝）