張沅薇自爆曾暴肥至140磅　身體響警號：制服嗰條褲碼數去到42

人稱Amy姐姐的張沅薇，於90年代主持兒童節目《閃電傳真機》躍升女神，但隨後為照顧兩名兒子息影廿載。今年初宣布復出進軍KOL界，開設個人頻道推出「Amy廚房」分享下廚心得，外貌保養得宜，但身為單親媽媽壓力甚大，自爆原來曾暴肥至140磅：「條褲碼數要去到42！」

張沅薇在IG貼出與《閃電傳真機》拍檔聚餐照，與譚玉瑛、黎芷珊、黃智賢及林柏希度過愉快晚上。復出後的張沅薇狀態甚勇，但好接受網上節目《開訪》訪問時，坦言復出心癮一直在，但兩三年前接到邀約絕不答應：「因為嗰陣我好肥，差不多好去到130、140磅，因為工作壓力太大，返到屋企又鍾意飲下酒，雪櫃長期有大量啤酒，嗰陣真係晚晚飲。嗰套制服嗰條褲碼數去到42，我自己都真係驚。」肥胖同時令身體健康響起警號，最終靠戒酒及清淡飲食減去數十磅。