《聲夢》黃奕斌爆內地拍劇辛酸經歷 黐頭套攪到成面紅晒
撰文：吳子生
出版：更新：
Hugo今日出席《善心滿載仁愛堂》記者會。（陳順禎攝）
《聲夢傳奇》學員黃奕斌（Hugo）於去年10月完成拍攝新劇《青春本我》的戲份後，隨即離港到內地為《無相之城》網劇開工，並且擔任男主角，成為第一個拍內地劇的《聲夢》學員。今日（15/8）Hugo現身尖沙咀出席《善心滿載仁愛堂》記者會時說：「其實我都係返咗嚟香港二十幾日，喺內地第一次拍劇我係覺得好好玩，完全唔覺得辛苦。不過因為拍古裝要戴頭套，係要用到酒精，點知搞到成塊面紅晒，先發覺原來我有酒精敏感，之後要搽藥先好得返。呢個係喺內地拍劇嘅最大嘅辛酸史。」
Hugo透露從內地返港只有二十多天。（陳順禎攝）
被問到內地拍劇酬金高？Hugo表示：「其實唔似香港咁計騷錢，咁所以我係唔知酬金會係幾多錢。（點解有呢個機會到內地拍劇？）其實我都唔知，因為我冇參與。我只係收到通知話我要到內地拍劇，嗰一刻我都覺得驚訝點解會係我。」