林秀怡今晚（20/8）現身將軍澳電視城出席無綫（TVB）籌款直播節目《善心滿載仁愛堂》。提到近期不少港人遭詐騙集團騙至柬埔寨，慘遭凌虐禁錮，引起全城關注。秀怡接受《香港01》表示：「其實真係好慘，睇到佢哋而家咁嘅狀況。佢哋大部分都係後生仔去得嘅都係想搵錢，佢哋經濟真係好拮据先會去行呢一步，想去改善生活，但點知去到竟然係另一種生活。最慘係佢哋想求助係冇人會幫到你，咁所以見到佢哋我係有啲心噏。」

秀怡透露五年前也曾踏足過柬埔寨登台唱歌，見證邊檢人員索小費：「好記得我哋落機入境嘅時候，見到隨行嘅工作人員係要畀錢啲關員，我哋先可以順利通行，然後坐車去酒店表演場地，又要畀錢警察開路護送，確保人生安全。抵達酒店見到每一個出口都會有警察把守，而且工作人員千叮萬囑我哋，千祈唔好離開酒店，避免人生安全受到威脅。」