林子善認可二嫂湯洛雯地位　公開催馬國明結婚：二哥你要快馬加鞭

黃嘉樂日前與攝影師女友江惠賢（Samantha）結婚，在酒店筵開逾20席舉行婚宴，圈中人緣甚佳的黃嘉樂請來一班「鐵馬家族」的好友馬國明、林子善及唐詩詠，再加上許家傑、楊潮凱、李天翔、陳偉洪等擔任兄弟團，馬明女友湯洛雯亦有到場祝賀，場面熱鬧！馬明同靚湯在現場大方合照，Sweet到漏，而林子善亦有Post出合照，更對靚湯讚不絕口！

林子善同太太孖住二哥馬明及準二嫂靚湯合照，並寫道：「有位網友喺網上留言提示，難得二哥二嫂喺度點解唔影相。老實講當晚真係好忙碌，但好彩我老婆當晚提我難得佢喺齊度，不如同佢哋影返張相紀念一下，我先醒起呢張相喺我老婆電話。再次多謝呢位網友嘅溫馨提示，我記得當晚回家老婆喺車上邊對二嫂讚不絕口，話佢個人好真、講嘢好直接、好爽、仲同佢好啱傾，成晚兩個傾，不停心諗咁就好了，家族好快多一個啱嘴型嘅成員，非常期待，二哥你要快馬加鞭喇！#鐵馬家族 #新成員」，看來靚湯已經獲得「鐵馬家族」的一致認可，不少網民都期待她與馬明快點拉埋天窗！