廣告女神譚旻萱（Mandy）最近為護膚品牌拍攝全新廣告，廣告短片中Mandy穿上純白色裝束，以女神光打造完美肌膚。拍攝前Mandy做足準備功夫，為保持白滑肌膚，每天敷面膜又吃得清淡；加上每天也跑步做Gym保持身段，最近3個月成功減去10磅贅肉，希望未來能夠以最佳狀態呈現大家眼前。

天生擁有女神外表的Mandy，其實內在是男仔頭性格，在拍攝期間要不停「扮斯文」兼忍笑，Mandy笑說：「我最鍾意拍護膚品廣告，記得我入行後最多護膚品客戶搵我，今次同新客戶合作，真係好開心！其實拍廣告時可以有機會Chok足全日，係咁Chok住撥頭髮，好難得咁感覺到自己好完美嘅一面。因為平時喺街一定唔會咁做，可以滿足我Chok得完美嘅慾望，希望嚟緊有客戶鍾意埋我把頭髮，搵我拍一個Chok住做嘅護髮產品廣告啦！哈哈！」

近期Mandy除了拍廣告、參與劇集拍攝等工作，她更努力學習唱歌和跳舞，她說：「工作之餘就係要增值自己，我一直努力做運動Keep弗，而家瘦咗都有10磅，始終瘦啲上鏡會靚啲。我仲有學唱歌同跳舞，而家鍾意咗跳舞，覺得好好玩、好有興趣！至於唱歌方面，雖然大家覺得我把聲鵝公喉，自己對唱歌都有啲緊張同唔自在，不過老師都讚我有潛質，我會再加啲努力，克服對唱歌嘅恐懼。」