王丹妮（Louise）今晚（9/9）現身灣仔會展為時裝匯演擔任模特兒上台行Catwalk。Louise表示:「其實我係好期待今次可以再行天橋，講真好實在呢幾年做咗演員之後我係冇再去行過騷，而今次咁難得可以返嚟我真係好開心。（有否試過在台上出意外？）我係試過好多，始終咁多年，令我諗起好做模特兒嘅辛酸史。好記得有一次，行行吓個斗零踭攝咗落條罅度，即刻拗柴，係痛到都唔敢出色，仲要扮冇事，然後彈返起身，繼續完成埋落去。當晚返到屋企成隻腳眼嗰個位係腫到豬蹄咁，之後我係要喺屋企攤咗成個禮拜先好得返。」