袁文傑不滿本地球壇衰落：我覺得香港足總係廢

袁文傑今日（23/9）齊齊現身電視城出席無綫處境喜劇《愛·回家之開心速遞》之「秋祭野餐」宣傳造勢活動。每逢秋風起，足球狂熱份子袁文傑就話會諗起讀書時，便會跑到加多利山邊，觀賞香港足球比賽盛事：「嗰陣時啲足球比賽係成日爆棚滿坐，好難買到飛，買唔到飛就要上山睇波。不過嗰陣時我就買到學生飛嘅，仲好記得當時學生飛係5蚊，嗰陣時對學生嚟講真係好貴。而我好記得當時香港嘅球壇，係連外國嘅雜誌都有刊登香港嘅聯賽榜。但對比今時今日香港嘅球壇搞成咁，我覺香港足總係廢。」

袁文傑滿腔怒火續說：「就好似09年嘅時候，港隊贏咗東亞運金牌之後，就推出咗『鳳凰計劃』，但唔知做咗啲咩成效出嚟，可能錢唔係太多，又可能啲嘢又唔知用咗喺邊度等等。去到今時今日，我覺得最多人批評嘅就係香港足總。我想強調，批評並不是詆毁佢，而係想佢哋再做好啲。就好似近呢幾年環境唔好，有啲球員薪水都出現問題，加運動員嘅黃金期真係好短，又望唔到前景出路，咁你足總係咪要做返啲嘢呢？」