「御用管家」梅蘭移居美國享兒女福 薛家燕讚前輩keep得靚兼精靈
童星出身的薛家燕,近日在美國登台重遇60、70年代合作過多部粵語片的梅蘭。梅蘭姐擅長飾演管家和工人角色,曾經在電視劇《他來自江湖》飾演文生(關海山飾)的管家,還有《義不容情》做雲姨(蘇杏旋飾)好姊姐,邵美琪媽媽,令人印象深刻。原來梅蘭姐早年跟子女移居美國20多年,盡享天倫之樂。
陳曼娜(Manna)在社交平台上載與梅蘭姐的合照,她們結伴欣賞薛家燕的演唱會。年逾80歲的梅蘭姐戴住冷帽和黑框眼鏡,皮膚白淨有光澤,精神好好。陳曼娜寫著:「萬水千山總是情!山長水遠飛到美國看相識數十年的好友家燕姐的演出,羅省的觀眾無限熱情!演唱會十分成功!巧遇碰見移民美國多年的前輩梅蘭姐姐,美國行程很開心!多謝主 。」
《香港01》聯絡身在美國登台的薛家燕,透露與梅蘭姐一直有保持聯絡,她說:「梅蘭姐我自細同佢拍電影,每次去美國都有見佢,返到香港又有聯絡。我幾年冇去羅省(洛杉磯),佢知我今次去嗰度登台,幾個月前已經約定話嚟到一定要見我,要去棒場、約食飯。」家燕姐指梅蘭姐十分好客,80幾歲依然好精靈,她說:「佢真係睇住我長大,我好細個拍戲就同佢合作,今次嚟到佢又請食飯,又畀利是我孫仔,戥我開心做咗嫲嫲。今晚去慶功宴都嚟join,佢嘅仔女都嚟陪住佢,仲有新抱同孫,好開心!佢又識Manna ,係我哋嘅前輩,德高望重,個個都好尊重佢。佢仲好精靈、好精神,keep得好靚。」
家燕姐最記得二人合作拍《七鳳嬉春》,她飾演梅蘭姐的妹妹,還有林鳳、凌波、王愛明、周坤玲等一齊合作,她說:「我哋做幾姐妹,同佢拍過好多戲,一齊練功,佢有次一拳打低唔記得邊個,大家講笑話原來你識功夫。」
陳曼娜受訪時透露剛到埗美國,準備與家人過新人,並順道欣賞相識多年的薛家燕演出,她說:「睇騷遇見移居美國好耐嘅梅蘭姐,佢精神狀態very good!我們睇完show大班人去食宵夜,佢沒有提回香港, 我諗佢在美國安居樂業了。」她表示從來沒有與對方合作,但相認識已久亦很熟絡咁,讚對方為人和藹可親。