【天命】何廣沛陳展鵬似足兩兄弟　和珅keep得太好欠霸氣？

無綫清宮古裝劇《天命》，由陳展鵬、何廣沛及譚俊彥擔正演出，一班主要演員更要遠赴內地橫店取景拍攝，近日陳展鵬在Instagram上載了一張跟何廣沛的合照，並留言叫大家估吓他們是什麼關係。網民紛紛留言話他們是飾演兩兄弟，如果大家真的如此想，少年你就太年輕了。

在劇中陳展鵬飾演晚清時期的大貪官和珅，而何廣沛則是他的兒子豐紳殷德，但純粹睇合照，展鵬外形相當年青，二人怎看也不似父子，究竟這是什麼玩法？何廣沛接受《香港01》訪問，謎底終於揭開，「其實展鵬喺戲裡面係有黐鬚嘅，嗰日咁啱佢拍完嗰場就收工，我仲要繼續拍，佢就去落妝拆走啲鬚先，突然醒起我哋合作嘅戲分已經拍完，嗰場係last，咪影相留念囉，開頭都冇為意，後尾post咗相出嚟，見展鵬落咗啲鬚，我哋真係好似兩兄弟咁。」

對於和珅的印象，觀眾總被《鐵齒銅牙紀曉嵐》中，專演和珅一角的內地演員王剛洗腦，但該劇以搞笑胡鬧為主，跟《天命》爭權奪利，爾虞我詐，完全是兩回事。何廣沛表示：「我係戲裡面係唯一一個唔係奸嘅人，其他人都係各懷鬼胎，而我嘅戲分主要環繞在譚俊彥嘅嘉慶帝，同埋展鵬嘅和珅之間，我一方面係展鵬個仔，同時又好忠心於皇上，所以成為咗磨心。(是否古裝版的《無間道》？)我又未至於做臥底，但會被皇帝利用，最後令到阿爸身陷險境，但唔係一心去跣阿爸嘅。」

何廣沛表示好開心能跟視帝展鵬合作，更大讚對方好戲，「今次係第一次同展鵬合作，佢梗係正啦，視帝嚟㗎嘛，佢啲戲一嚟就有㗎啦。劇裡面對住我呢個仔好激心，但佢嘅感情戲好內斂，好似我哋影相嗰日場戲，係講我哋有個親人死咗，但因為佢位高權重，雖然好傷心但唔可以發洩出嚟，好多內心戲演得好好。」何廣沛表示拍畢《天命》後，會放一個短暫假期，待留返長頭髮，到7月將會有一齣關於醫護人員的時裝劇，粉絲肯定相當期待他的演出。