炎明熹首拍劇客串《愛·回家》 自爆小學已是鐵粉︰由細睇到大

撰文:趙允琳
出版:更新:

炎明熹(Gigi)貴為《聲夢傳奇》第一季的總冠軍得主,出道以來馬不停蹄出歌、登台兼參加內地歌唱節目,歌唱事業發展得順風順水。人氣強勁的她早前獲邀客串《愛·回家之開心速遞》,首次拍劇的她將會於明晚年初五(26日)的一集登場,並在劇中將演回「炎明熹」,未播已經令不少粉絲期待。

炎明熹(前排中)年初五「登陸」《愛‧回家之開心速遞》

對於首度獲邀「登陸」《愛‧回家》,Gigi坦言大感興奮,並直認由小學時開始已是捧場客:「我有追開《愛‧回家》,時間許可,我會準時八點鐘喺電視面前觀看,佢哋嘅內容會令到我睇完之後好開心,佢哋每集又會帶出一啲信息,我覺得好生活化。呢個處境劇我係由細睇到大,小學時係《八時入席》,之後再到後尾有唔同系列。」Gigi又指能與劇中角色真正合作,感覺既榮幸又夢幻:「真係不可思議,冇諗過以前甚至依家睇緊嘅劇,會有機會遇到佢哋(劇中角色),雖然有時喺TVB會遇到大家,但唔會真係話傾偈嗰種。」Gigi續指劇中最尊敬角色是劉丹,並爭取機會與對方合照:「我知佢做咗好耐《愛‧回家》,我好開心可以加入呢個大家庭,因為我見到佢哋好似屋企人咁相處,佢哋會互相叫對方阿爸、家姐或者阿妹,然後佢哋亦都好照顧我。」

Gigi在劇中飾演自己。

另外Gigi還大讚劇中道具相當像真:「我覺得有個好得意嘅地方,我一直以為新威龍廣場係一個真嘅廣場,然後Key個名落去,後來我知道原來係一個廠景,係特登搭出嚟,我覺得好神奇,同埋入面啲產品同店名都好得意,同嗰個𨋢真係好真。」Gigi更透露希望日後能多點拍劇,因為她很喜歡和公司的幕後工作人員相處,皆因很有愛,Gigi說:「我一直好想拍劇,我覺得拍劇好有趣,我好鐘意同工作人員相處,拍劇時真係會經常對到大家,而佢哋真係非常之好,好似屋企人咁,所以我希望儲多啲經驗同能力後再拍劇。」喜歡挑戰自己的Gigi,更笑言沒有特別想做的角色:「因為咩角色都想做。」說話內容充滿童真的Gigi,笑著訴說拍攝當日遇到兩名相當可愛的小朋友,並很高興對方提出合照要求,Gigi當時還拿出兩顆朱古力氹小朋友開心,行徑與小朋友一樣可愛,Gigi興奮地說:「嗰日誤打誤撞帶咗兩粒朱古力,其實原本我係想試吓個味,因為冇食過,最後我就一人一粒畀佢哋食,啱啱好,Yeah!」

Gigi大讚店名同產品名都好創新。