陳蕾（Panther）是圈中出名熱愛打機的歌手，亦不時開Live直播讓粉絲一睹自己打機的風采。昨晚（27/1）凌晨一時，她又在IG直播玩賽車遊戲，更邀得樂壇天后容祖兒（Joey）連線鬥車。陳蕾教車師傅上身，教導「P牌」Joey賽車技巧和需注意的事項，最終成功令Joey由第12名升上第四名，陳蕾不禁連番爆出金句：「教識徒弟冇師傅」、「師傅都唔畀面呀」、「恩將仇報」，Joey附和：「忘恩負義」、「食碗面，反碗底」，場面相當爆笑。

比賽的過程中，陳蕾不斷傳授賽車技巧給Joey：「數到2起步，撳要撳實，唔好撳撳下放手」、「如果一起步都12，你架車可能要搞搞佢，可能未必係最好嘅車」，又刻意慢過Joey在後面觀察要改善的地方：「你又亂飄移，又亂咁扭」、「頭先啲斜位可以上㗎喎」，Joey語帶唏噓說：「我知道，我唔係唔想上，我係上唔到…」，𠱁得觀看直播的二千多位觀眾非常開心。直播結束前，陳蕾笑言要處理歌手電競事務：「好多歌手要照顧，成立咗賽車班咁，下次再打機。」