張建聲布吉之旅顯父愛 攬住陳國坤兒子不肯放
撰文：溫菁莉
出版：更新：
早前拍完網絡劇《反黑》的張建聲 （Justin） ，隨即接下三部電影及另一部網劇，檔期排到密麻麻，所以《反黑》劇組拖馬去布吉旅行，起初Justin因拍戲冇期未能同行，其後因拍攝中的劇組突然有幾日假，所以Justin就漏夜執包袱飛去布吉會合《反黑》團隊，包括監製陳國坤（小龍）、李璨琛、吳毅將及姜文杰等，期間李璨琛還上載游水的片段到Instagram！
小龍的兒子陳真十分趣緻，張建聲攬住唔放。
Justin形容布吉之旅頻撲過返工，但大家對足7、8個月現在再靜下來談天說地，感覺好寫意。
《反黑》全體人員在今次布吉之旅都玩得勁開心，其中陳國坤還帶埋一歲囝囝陳真同行，可以話係搶晒鏡，向來鍾意小朋友的Justin就成日攬住陳真唔放，他笑說：「佢真係好可愛，精精靈靈、chok晒樣，但又第一次落水，成班uncle好似一齊見證住佢成長，好過癮。」
Justin以為去到布吉可以好relax抖番幾日，不過對住《反黑》一班演員就想抖都難，事關成班人竟然玩爆房，其中「受害者」吳毅將慘被爆開房門，再被眾人拎水槍狂射，搞到成間房連床連人全部濕晒，Justin說：「好彩佢哋都玩到攰攰哋，因為我係last嗰幾日才join大隊，佢哋都冇心機搞我，否則我諗我要拎行李頂住度門先瞓到，因為班人真係癲。」