MIRROR推首支英文單曲《RUMOURS》 姜濤望先獲香港觀眾認可

撰文:林得懿
出版:更新:
MIRROR首支英文歌《RUMOURS》MV正式公開,女主角為譚旻萱。

MIRROR首度推出英文單曲《RUMOURS》,MV今晚(17日)上架,為突顯香港特色,MV分別在舊色理髮店、sky 100及香港大球場進行拍攝。MV中,12子統一以黑色西裝上陣,並周旋於女主角譚旻萱(Mandy)之間。其中一幕,Lokman、Alton與Mandy同時入場,眾人都忍唔住笑,原來係Mandy太高。

不少成員都係首次去到舊式理髮店,大讚十分有風格。

首次灌錄英文歌,Lokman坦言「幾好玩」,並透露聲樂教練不斷幫他們執口音,每當他們唱完一句,即時讚到天上有地下無;而姜濤表示唱英文歌時,感覺Ian的聲音最為自然,而Anson Lo則謂:「出道以嚟都未試過錄咁多英文字,好好玩!Andrew係錄開國際音樂嘅人,俾佢讚我英文好,令我好自豪。」而Jer亦感激Andrew的幫忙,他說:「佢喺美國有時差,每次都係凌晨4、5點起身幫我哋,好似未瞓醒咁,呢個係有啲好笑,但好開心可以同到佢合作。」

MIRROR對於進外海一事未有多想。

對於進軍海外一事,成員各有不同看法,Jer認為是一個很好的鍛鍊機會,而Anson Lo認為要達到國際性的標準很難,所以並不敢奢望太多,但求盡力做好。姜濤希望可以先得到香港觀眾認可,並謂:「海外觀眾係好長遠嘅事,等大家基礎好啲先再諗,而家唔諗太多。」Edan亦表示沒有太多進軍海外的想法,今次推出《RUMOURS》是想有多一機會令其他觀眾了解MIRROR。