為預祝5.14母親節，無綫今晚（7日）播出特備節目《獎門人I Love媽媽感謝祭》，久別回歸的金剛艷福無邊，玩「開心無敵啜乒乓」和傳紫菜時，優待幾乎輪流啜勻「一舞傾城」六美女，當中以陳法蓉（Monica）最陰公，一開始已擺出一副嫌棄樣說：「我可唔可以要黃宗澤」，錢嘉樂笑言：「呢個都係王中宅。」

不過，好戲在後頭，原來最驚嚇場面是在「過過過」環節，姚瑩瑩要用腳夾住支筆將拍檔何芷珊（原名何綺雲）畫到大花面，變相要聞臭腳，搞到姚瑩瑩勁唔好意思。緊接玩「神秘箱」的趙希洛，則獲安排捉田雞，明顯受驚過度搞變容變色，驚叫爆喊！她全程喪嗌之餘，更嚇到不斷「跳舞」，最後出盡「九牛二虎之力」成功挑戰捉田雞。之後輪到陳法蓉見到箱中的大鱔亦嚇至花容失色，最後要「出貓」搵蔡潔幫拖。