Rose Ma 520與粉絲慶祝30歲生日：希望身體健康

Rose Ma馬俊怡為慶祝30歲生日，今日（20日）於觀塘工廈與粉絲舉行生日派對。Rose Ma受訪時透露生日願望，希望身體健康：「其實聽落呢個生日願望，好似好老土，但呢樣嘢對我嚟講先珍貴。因為幾個月前我大病一場，因為患咗重感冒，搞到我臥床咗兩個星期，要由媽咪照顧我。而佢每日都會攞湯水上嚟我屋企俾我飲，多得佢喺呢段時間不停咁照顧我。」

被問到今年書展會否推出新寫真集？Rose Ma表示不會：「可能3年疫情嘅關係，可能放得太耐，變咗我冇咗呢個衝動去做呢件事。不過日後可能會有，但而家就唔知。睇返以往我出一本寫真成本其實都好貴，根本係唔會賺錢，相對唔蝕錢我已經好開心。咁所以我又唔想貿貿然是但咁出一本寫真，變咗好多嘢係要詳細咁諗過。」