十優港姐麥明詩近來除了被盛讚貼地之外，自出道以來，都有傳過不少緋聞。最近又有新的緋聞對象，就是擁有42吋胸肌兼前香港游泳代表隊成員的余德丞。兩人被指因新劇《誇世代》朝夕相對而撻著，更有傳媒拍到他們拍劇中途單獨到日本餐廳撐檯腳，食完還有下場，到附近的麥當勞買雪糕，仲話「你一啖，我一啖」咁恩愛！

麥明詩今日出席快餐店活動，面對意大利性感數學教授Pietro Boselli，Louisa大讚對方「英俊智慧並重」。其後有個遊戲環節，教授更一手捉住Louisa右手，幫手貼上咖啡豆，她更變得一臉害羞。事後問過Louisa剛才有無觸電感覺，她笑言：「邊有咁易呀！我好難追㗎！哈哈！」至於會否跟教授深入了解？Louisa說：「有機會先啦！」

她回應緋聞時，笑言該報導有「標題黨」之嫌，事實沒有互餵的情況出現：「成件事都非常簡單。中國人文化呢都係叫啲菜式都會分嚟食，正如你同我食飯叫碟餸，都會一人夾啲嚟食，咁雪糕都係嘢食，咁就大家都食唔晒，不如一人一半啦，但就完全唔係你一啖我一啖囉。」麥明詩就「你一啖，我一啖」的說法再補充：「咁雪糕係一人一半，咁我食飯都一碟餸兩份分，一個大氣層啲氣都兩份唞啦，係咪先？」力證沒有甚麼食口水尾的情況發生。

至於與余德丞的關係，麥明詩定義為普通朋友關係，她說：「其實都唔係好熟㗎啫，一齊去食嘢只不過係拍戲中間有兩三個鐘頭係冇我同佢嘅戲份，咁咪去食嘢囉。（做咩唔叫埋其他人？）係因為得我哋得閒，加上我哋有感情線，多數得我同佢兩個。」今次又再傳緋聞，麥明詩坦言：「盡量會避，但嘢都要食㗎，咁如果大家肚餓，要分開去食，又好似唔係幾禮貌，啫係『我死都唔同你食，你去隔離張檯』，咁又唔會囉，盡量唔好有誤會，但都要正常人要有嘅禮貌。」

至於繼上次樂視籃球評述張存華後，今次的緋聞對象是前游泳港隊成員余德丞，兩者不約而同都是健碩身型，難道麥明詩鐘意大隻男？她就否認：「咁又唔係嘅，我鐘意嘅類型都好廣泛嘅。（咁同余德丞有冇機會？）我諗都冇乜㗎啦，因為雖然廣，但唔係我理想個type。」