陳百祥曾於台慶發生嚴重意外　傷疤仍清晰：7個電油彈圍住我炸

「叻哥」陳百祥曾在1982年為TVB台慶預演時發生嚴重意外，事隔41年疤痕仍清晰可見！日前，叻哥接受內地經理人訪問時就舊事重提，並展露傷疤，他講道：「因為我命太大，7個電油彈圍住我炸，都炸我唔死，就炸咗入40日醫院！啲手皮就冇咗燒晒，嗰陣都燒到塊面，好彩有戴頭盔，但燒到面燒到身，但醫生話要植皮。」

雖然醫生建議植皮，但叻哥竟然因為一個理由而拒絕：「佢話唔植皮就要耐啲生，我問佢點樣植皮，佢話要喺屁股度切啲出嚟補返佢咪得囉，我話下咁就唔好啦，補咗喺度，咪日日俾人摸我屎忽？唔得，所以寧願瞓多幾日，呢啲係真皮，唔係植皮，一定唔係我囉柚啲皮。」

雖然曾遭遇嚴重意外，但叻哥仍樂觀面對：「成身燒着晒，幾支滅火桶追住我嚟噴！嗰陣着咗對Boots，醫生要用剪刀剪開，因為融咗，你話啲電油燒得幾犀利，有時命硬咪攞嚟曬囉！」去年叻哥曾宣布不會再參與主持、電視及電影等所有演藝工作，並透露已有新目標，會轉行另創事業。