大部分貓奴也有一個經驗，到寵物用品店買了一張心儀的貓床或貓屋，歡天喜地拆盒開箱，還要親自動手裝嵌，跟着只等待主子主持啟用儀式，咦，主子呢？正在那個原先盛載貓床組件的紙皮盒上呼呼大睡，貓奴心內只能嘆句「主子的心意真的莫測高深」。近日有網民索性用A4紙箱，親自製作一間貓之家給愛貓，相當窩心。

該名網民家中的貓咪雖然不是名種貓，但十分精靈活潑，一樣獲得貓奴寵愛，話說貓奴見到主子對一個裝A4紙的紙盒相當有興趣，靈機一觸，將A4紙盒改裝，外殼製作成地鐵站，寫着「皮蛋露宿之家」，內裡一半空間鋪上了貓抓板，而且以黑布簾間開紙盒後方，讓貓咪擁有私人空間，最後在貓屋外加上膠貼，防止主子用爪破壞，設想得甚為周到。該網民開post展示他的大作，又見到貓咪在新居進出休息，顯得十分喜愛，即獲得一班貓奴紛紛俾Like，激讚樓主有心思。

前無綫藝人陳潔玲，亦是一名不折不扣的貓奴，她接受《香港01》訪問，提起兩位主子波兒及Taffy，語氣即變得十分興奮，「佢哋見到盒形嘅嘢就好瘋狂，有時買完鞋，咪有個鞋盒嘅，佢哋就會塞自己入去。又試過去旅行執喼，佢哋自己都會捐入去個喼度，唔肯出返嚟。咁都未算呀，有時有啲大啲嘅袋，好似環保袋咁呢，佢哋都會走入去，唔知玩乜嘢㗎。」

陳潔玲表示雖然家中有了專用貓床，但牠們卻相當有性格，不是買了床就會瞓，「佢哋一時時啦，唔係成日瞓㗎，要睇心情，有時又會跳上床同我瞓咁囉。」提到有貓奴自製貓居，原來陳潔玲也有類似經驗，「屋企放咗鞋盒或者電器盒，又見佢哋鍾意瞓入去，咁咪幫佢哋整靚啲囉，主要都係裝飾下個盒，外邊整啲貼紙，寫住佢個名咁囉，裡邊就會鋪啲毛巾等佢哋瞓得舒服啲，不過瞓一排佢哋就會整爛個盒，搞到周圍紙皮碎，個盒當然報銷啦。」

雖然由貓奴親手DIY的貓屋，外形未必比得上買回來的，但陳潔玲就認為貓奴心態，總想為貓咪做點事，「為佢哋整個屋企出嚟，同寵物間嘅感情亦會好啲。(搞完一輪貓咪唔瞓呢？)除咗睇佢哋心情，都可以放啲令佢哋舒服開心嗰啲貓薄荷，再加埋平時佢哋玩開嘅玩具，佢哋實入去，仲會玩到癲晒。」當大家也渴望可以置業安居，不用做無殼蝸牛，現在簡簡單單已可為貓咪送上一個五星級的家，貓貓真的好幸福呀。