李日朗（Don）入行22年，歌手身份出道的他，08年毅然隻身「北漂」。早前他接受港台節目《安哥同學會》訪問時，提到北上初期，冇人脈、冇Job，甚至因要瞓朋友屋企客廳而曾被指慘。節目中，李日朗解釋內地嘅屋比較大，所以就算瞓沙發都冇問題「又點會慘？去一次一個大城市，由零開始好合理，唔好寄望喺香港有少少知名度，去到另一個市場用嗰少少知名度可以打開新環境。」

李日朗指他足足等了10個月才迎來了第一部作品，期間一直進行casting，又不時去到片場派發自己嘅履歷表：「喺香港我係唔使casting，導演啱就搵你。因為我無見過工，所以唔知履歷表要點打，我整咗10頁出嚟。」李日朗表示由於北上前他在四川扶窮，花光了大部分積蓄，所以在等接戲嘅時候，他除了將香港所租嘅屋退租以取回按金之外，連豎琴都要變賣，全副身家得幾萬元。「當時會徬徨，有錢又好無錢又好，都唔敢用。」李日朗曾打算在內地落地生根，直到7年前轉做導演後，有較多時間與父母見面，驚覺對方老了不少，於是又萌生回港嘅打算。