上世紀末紅極一時的日本女歌手鈴木亞美近年星途黯淡，只是30代卻經常被指個樣似足大媽，她去年跟圈外男友奉子成婚，今年1月升呢做媽媽後帶埋個仔上節目講湊仔經，唔止個樣回春，仲成功帶挈人氣回彈返少少，日前又出新書分享安胎食譜，加上用心經營社交網站，積極鋪路轉型做慈母界KOL。

鈴木亞美今日為新書《可愛孕婦的安胎食譜》（かわいい妊婦の安産レシピ）舉行記者會，書中邀來營養師合作，詳細列明每個菜式所含的營養素，色、香、味、營養價值俱全。產子後首次出席活動的鈴木自言非常緊張，還要預先喊話「媽媽，加油！」為自己打氣，她透露陀B期間一共增磅13公斤，透過控制飲食，產後2個月就成功回復身材，認真犀利。鈴木亞美不單可以極速瘦身，生完仲靚過以前，她自爆其實最想是生夠4個小朋友組織大家庭，不過現實一點考慮後大概只會生2個，最好下一個生女咁話。

35歲的鈴木亞美早於1998年16歲就出道，獲日本樂擅教父小室哲哉為她度身打造歌曲，活潑形象加上可愛笑容，人氣力壓同期出道的「步姐」濱崎步。可惜一剎那光輝真的不代表永恆，鈴木亞美出道兩年多就因合約糾紛跟公司解約，之後在歌壇浮浮沉沉，始終未能東山再起，她去年下嫁小7歲的圈外人，上個月帶囝囝一起上節目，自爆雖然一出道就爆紅，其實當時公司管得好嚴，嚴禁她跟其他藝人交流，連出騷坐埋隔籬都無得傾偈，生活中只有經理人，真係慘到無朋友。