前DJ梁安琪（Angel）今日（4/9）現身火炭出席音樂環保慈善計劃啟動禮。Angel受訪時表示：「今次舉辦呢個慈善計劃，主要係希望為香港嘅青少年打開條音樂路。明白到好多殘疾人士佢哋都好鍾意夾Band，但基於經濟能力，佢哋未必買到一啲樂器，所以我就諗，如果大家有一啲樂器用唔着嘅，都可以攞到我呢個音樂中心，然後我哋就會捐畀一個特定嘅殘疾人士機構，讓佢哋打開條音樂路。」

對於好朋友梁朝偉獲頒第 80 屆威尼斯影展「終身成就金獅獎」，Angel表現激動：「因為喺我廣播道路上面，我已經係好欣賞佢，仲記得佢一出嗰首歌曲《你是如此難以忘記》，我第一次聽到嘅時候，真係好有感覺，聽完之後真係好似個歌名咁「你是如此難以忘記」。之後因為佢要為唱片宣傳，佢係會成日上嚟我個節目，大家一齊傾音樂嘅嘢。但後尾佢就冇再喺音樂方面發展，反而係好專注喺電影發展，今日見到佢攞到呢個獎，我心情係好激動，因為呢個獎係第一個華人攞到，真係香港嘅驕傲。」