去邊啊Do姐｜Tyson Yoshi表現生硬　被Do姐氣場震懾：對住佢驚㗎

Tyson Yoshi今日（15/9）現身銅鑼灣出席時裝品牌活動。近日有網民批評他有份參與拍攝的HOY TV旅遊節目 《去邊啊Do姐》很悶，就連同Do姐（鄭裕玲）的互動亦表現生硬，感覺尷尬，更有網民指Do姐同5位男神嘉賓其實相當格格不入，無論年齡、活力差距都實在太遠，毫無吸引力之餘，亦完全沒有火花可言，絕對是錯配，甚至直指收視低就是最好的印證。

對此，Tyson Yoshi在接受《香港01》訪問時就表示：「尋日節目播咗出街，睇返自己嘅表現係好生硬。（硬喺邊度？）我諗全身都非常生硬，Do姐對住我都可能拳頭硬。其實諗返起嗰日，我啱啱落完機就要即刻拍跳舞，仲要係同Do姐見面，變咗有時都唔會同Do姐講多幾句情況下，Do就叫我跳舞。不過大家之後睇嗰集，會見到我放鬆返少少。（係咪Do姐唔夠靚女令你提唔起勁？）Do姐靚女，Do姐係一位有氣場嘅靚女，變咗我對住佢梗係驚㗎啦，大佬！」