【奇妙電視】妹頭脫離球彩唔捨得 爆阿澤大鑊:嬲到好似小朋友咁

撰文:
最後更新日期:

妹頭對阿澤嘅廚藝都應該好佩服。(妹頭Facebook)

盧頌恩(妹頭)之前講過杜汶澤好鍾意講鹹濕笑話,而且表面又衰衰格格咁,不過其實對人十分之好。其實除了表面之外,阿澤原來做事都十分認真,唔會草草交貨,如果自己煮出來的食物未達標準,絕對不會靠做馬,拎第二個製成品出來畀嘉賓食。其實這種態度係做飲食節目的正確想法,飲食節目並不是一味靠外在,實力都好重要!

阿澤仲會請成組人食飯。(妹頭Facebook)

妹頭在接受《香港01》訪問時,就講到有一次阿澤對自己成品唔滿意,所以決定重頭又拍過:「佢就覺得自己最拿手係整麵包布丁,佢覺得係最好食嘅麵包布丁,好有自信架,點知就整衰咗。佢就話因為個焗爐唔係自己用開,咁係真嘅,因為真係第一次用嗰個爐。整完之後一啲都唔挺身,入面就淋晒咁,之後佢好嬲自己,嬲到好似成個細路仔咁無晒心機,跟住就話唔好拍喇,下次再拍過,結果全世界即刻可以收工。不過佢之後整第二次,係空前咁成功,全組人都話好好食,兩分鐘就食晒,連嘉賓都畀10分。」

阿澤繼續寫嘢食。(杜汶澤Facebook)

至於日後的工作,妹頭指自己基本上已經離開球彩台,並表示十分不捨,她說:「唔捨得球彩台呢個成長地啦,因為我一個女仔唔識波,跟住之後四五年係咁學,講好多足球術語,講到就算連做live都唔會再驚。仲要之後勁鍾意做live,因為正常嘅主持都會驚做live架嘛,但係而家我最鍾意就做live,因為最即興、最真誠情,同埋最正係睇到個主持有冇價值。球彩同啲觀眾好互動,佢地對我地都好好,成日都會買嘢俾我地食,仲試過專登喺阿仙奴買紀念品俾我,佢地真係超好!我知高登俾咗個啅號我叫「大波女神」,因為我講親嘅賽事都好多波入,我自己都人5個統計係真,都搵到少少成功感架。內地啲球迷仲誇張,直頭當我神咁拜,話一定會追住我嚟睇,連溫書都叫我send句加油俾佢。」公司希望她脫離球彩,所以向綜藝節目進發,她認為自己是一個比較「放」的主持,尤其係阿澤呢類節目就啱晒佢。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。