蔣志光變包青天窩藏外星人　開封七子俾布偉傑追殺係咩事？

睇過《包青天》的觀眾，對這位宋朝的一代清官包拯，相信絕不陌生，但包拯年青時原來不是清官，更遑論明察秋毫，斷案如神，聽落已經十分出人意表，更神奇是他曾經遇過外星人，更將他們帶到開封府，大家未聽過？當然啦，講緊的不是真實歷史，甚至連野史都不是，講緊的是音樂劇《我和青天有個秘密》。

本港觀眾最熟悉的包青天，要數到金超群及狄龍版本，但今次音樂劇上的包拯，卻換上了瘦瘦削削的蔣志光，而包嫂柳花明則是由向海嵐飾演，故事開始的包拯其實無諗過做清官，純粹得過且過，其後包嫂被誣陷入獄，他卻只懂得借酒澆愁，完全是逃避現實。大家一定會問，開封府不是有開封七子嗎？聰明機智的公孫策，靚仔又打得的展昭，四大護衛王朝、馬漢、張龍、趙虎，全部去晒邊？

前無綫藝人，「御用老外」布偉傑原來亦有份演出該劇，他飾演從外國來華的可倫布，他接受《香港01》訪問解釋，「開封府中除咗包拯，其餘嘅6人都係外星人，佢哋嘅出現，主要係教包拯點樣去做好人，做一個好官。至於我嘅角色，就係外國派嚟中國觀察月亮有冇高智慧生物，初初嚟到中國仲話我唔識中文嘅，但個劇講緊20年嘅嘢，所以之後我都會識講中文嘅。」

劇情發展是包拯遇上這6名天外來客，在對方開導下，決意重新振作，不但救出老婆柳花明，在經過多年努力，更成為一位愛民如子，清廉如水的好官，此時外星人要返回太空，無奈跟包拯分手，但他們乘坐的飛碟卻在半空爆炸，傷心難受的包拯誓要查出兇手。這宗外星兇案是否牽涉到布偉傑呢？「劇裡面講我同林穎彤、林欣彤(分別飾Angel)，在另一個洲過嚟，嗰度嘅科技好先進嘅，我嘅任務係要搵外星人出嚟，然後暗殺佢哋。」不過對於外星人的生死，布偉傑卻大賣關子，待觀眾入場才有分曉。

話明是音樂劇，又有蔣志光、林欣彤等唱家班，當然有大把靚歌聽啦，該劇的一大賣點，是19歲的導演陳恩碩(Tom)，更身兼編劇、作曲、填詞，而劇中30首原創歌曲，就是出自他的手筆，而其中更包括蔣志光闊別樂壇24年，第一首新歌《如果我可以》，讓粉絲相當期待。《我和青天有個秘密》將在8月18日起，一連演出41場，布偉傑表示「呢個劇不但係西方百老匯嘅規模，而且其中有好多大團都唔會做嘅嘢，就係全月演出無休息一日。」看來一班演員不但要練歌練戲，而且更要有充沛體力，面對這一次音樂劇的挑戰。