《造星V》5子首次拍綜藝 亨仔狂窒希晉︰佢個腦Multi Task唔到
黃家灝(KC)、陳鎮亨(亨仔)、王希晉(希晉)、卓金樂(Kim)和田曜誠(Tsoul)繼《造星V》後,再次喺《沖繩任你點》交手,學亨仔話齋,公司出錢俾自己飲飲食食,加上有4位「磨碌」一齊,真係好鬼著數。節目今個星期首播,5位已經諗定第二季(如果有)要去邊,仲完全唔理觀眾感受,表示可以泳褲上陣⋯⋯
希晉樂做下靶
講到日本,KC自認狂熱,但沖繩都係第一次去;而全程做埋司機一職嘅Tsoul就話細細個成日睇旅遊節目,估唔到如今自己會變成主持,而最重要嘅係人腳無得輸。 話晒都第一次拍綜藝節目,5位都自認仲有好多不足之處,而向來唔多出聲嘅希晉更全程做下靶,他說:「《造星》時已經唔太喜歡講嘢,所以一對鏡頭就會好正經,我係有進步嘅,靠佢哋keep住串我。」大部分時間都在串希晉嘅亨仔即時補充:「佢個腦multi task唔到,成日唔見電話、護照,又講啲唔好笑嘅嘢。」對於大家毫不留手嘅攻擊,希晉表示此乃相處模式,所以唔會反感。
KC錯撩人妻被兇
除咗互串之外,講到整個沖繩之旅最忘掉畫面,Tsoul就話見到一位「係男仔都識嘅」神秘嘉賓。「現役嘅,係男仔都會識㗎啦。我同佢係喺酒店房見,當時真係嚇窒咗,但最好笑係亨仔同Kim唔知佢哋係邊個,只係覺得佢靚女一名,做完task先知。」 節目叫得《沖繩任你點》,當中有唔少項目都係由觀眾票選而定,KC其中一個任務係要穿試金色西裝喺國際通問女生拎IG,結果佢問著一位日本人妻,隨即被對方老公「兇」,而負責遙距佢嘅4位好兄弟則留在車上食花生。
作為造星仔仔中最快出埠拍節目,看似開心,但事實上除了《沖繩任你點》外,幾位暫時沒有其他節目在身,平日曝光亦不算高,問到會否搶心人氣隨時間流走,亨仔十分淡定表示:「 無㗎啦⋯⋯盡力囉」隨後補充表示想拍校園、搞笑題目劇集,而KC則希望繼續以綜藝為主,他說:「同埋我哋5個人都幾好,你唔熟的話無咁易發揮, 有時攰其他人可以補上。」