夏蕙姨大搞自傳電影 應要求着泳衣亮相:泳衣好閒,只有一樣唔着
撰文:林迅景
出版:更新:
黃夏蕙夏蕙姨今晚(28/01)設宴「夏蕙慈善基金」近100席為保良局籌款,其中潘志文、盧海鵬、周啟生 、劉錫賢等演藝人都有到場。
夏蕙姨接受《香港01》訪問時,表示有投資者出資拍她的自傳電影。她說:「我希望畀人知道我一生嘅嘢。(我一生)多姿多彩,有喜又有悲,又有歡樂又有苦辣。」電影公司藝人陳建興補充,電影正在籌備中。夏蕙姨亦透露,電影當中會有40套靚衫亮相。
提到夏蕙姨,大家必定會想每年她cosplay 12生肖造型去上頭柱香的畫面,她也透過電影中也會出現12生肖造型。問到會否邀請劉錫賢出鏡,劉錫賢就說:「未喎,未邀請我,哈哈哈。」夏蕙姨補充說:「我實會邀請佢。實會多姿多彩。」哪一方面?她回答:「面面都多姿多彩。」
陳建興亦大爆,原來電影會以夏蕙姨的死亡作開頭。問道會不會感到不吉利,夏蕙姨回答:「我唔避忌,我瞓棺材㗎。」對女主角選角有什麼要求?需要和夏蕙姨一樣咁靚?她回答:「唔係,要同我一樣咁多姿多彩。」身材呢?她坦言:「我身材唔係靚嘅,我唔夠高。」
問到電影內容會不會有大揭秘,夏蕙姨回答:「要爆都幾廿年前爆,而家邊有嘢爆。」如果有網民說想睇夏蕙姨穿泳衣呢?她十分大方,回答:「泳衣就好閒啫,只有係有一樣,兩點式就唔着啦。」劉錫賢和陳建興都大驚:「兩點式?」劉錫賢:「咁第三點呢?」夏蕙姨再修正說:「三點式唔着。」