江美儀被傳升呢視后慘遭無綫放冷板凳冇劇拍　拒絕搲撈16字回應

江美儀今日（6/3）現身將軍澳電視城出席無綫「新一季，綜藝魂·嚟料！」記者會。對於有傳她去年憑劇集《下流上車族》飾演車太一角勇奪「最佳女主角」榮升視后慘遭無綫冷待一直無劇拍，引起網民關注。

江美儀接受《香港01》訪問時表示：「其實又唔係少咗工作，例如我拍緊劇咁，我就主持唔到《一個好人》咁有意義嘅節目，又或者公司想安排話畀大家聽，我除咗演戲得之外，做主持都唔差。（網民搶心你坐冷板凳！）你唔放自己喺冷板凳度，冇人放到你㗎，因為我可以喺出面接嘢做嘛。（會唔會主動敲監製房搲撈？）係咪你去𢱑就搲到先？（可能真係得！）咁一切都隨緣。（有咁嘅傳聞有冇唔開心？）我自己開心咪得囉，哈哈，因為我冇理得咁多。（情願冇獎攞，但有嘢做，還是有獎攞冇嘢做？）咁又冇得咁講喎，我反而好慶幸我呢段日子，時間多我可以做慈善嘅嘢，同埋我嚟近我會同甘比有個慈善合作，我會親手做好多飾物，擺喺佢度義賣，佢會教我用毛冷勾公仔，咁所以佢係我老師嚟，因為我本身唔識勾公仔㗎。」