【同盟】激吻姚子羚惹網友葡萄 陳山聰唔尷尬：今晚仲有！
TVB《同盟》播出了第二集，仍然吸引了不少觀眾坐定定收睇，更引起廣泛討論。有好幾個地方都讓網民聯想起其他電影，就好似鮑姐集團的基地，就被網民FF成「好似Tony Stark（鐵甲奇俠男主角）咁個基地有裝備」、「真係好似睇緊Kingsman（皇家特工）呀」，又話情節似足打機，「去到一個check point先至攞裝備，但槍都冇把。」、「真係打機咁玩」、「家陣打機咩？」點都好，網民有咁多想像，換個角度睇，未知TVB近期是否轉走貼地路線，嘗試避開老土劇情，吸引一眾後生仔注意。不過昨晚的重點，肯定是陳山聰與姚子羚這一對。
話說姚子羚不滿陳山聰做危險工作卻不講一句，害她坐立不安。當男方再現身的時候，姚子羚就一下飛刀，再來一記耳光發洩，質問：「你知唔知我擔心你？」陳山聰見到女友嬲嬲豬，於是就採取溫柔的安撫，來一個「和情人深深一吻，來代替講話，好～嘛？」兩人親吻了一陣子，姚子羚就要求陳山聰以後打開電話的location，要定位追蹤男朋友，陳山聰回了一句：「你想好似啲一般女人咁監視我呀？」一般女人係指邊個就唔知，但係一眾網友巴打就好恨被姚子羚管。光是kiss那幕，不少巴打睇到拳頭都硬埋，非常妒忌陳山聰可以一親姚子羚芳澤。亦都有唔少人好奇，兩人現實中咁friend，點解都可以kiss得咁放，唔尷尬咩？
記者就問到陳山聰，對於太friend會否老尷的問題，他斬釘截鐵地話唔會！仲話：「因為熟，大家更有默契。我哋真係好似兄弟姊妹咁，所以一啲尷尬都冇。而且我已經同佢男朋友攞正牌，可以錫佢，所以見到出嚟嘅嘢都好真實囉！」姚子羚在劇中造型如此惹火，山聰再親熱落去，巴打會越來越妒忌……他反而說：「我係一個演員，我照Jazz（導演）嘅要求盡量配合，希望整個劇情會好，同埋咁更證明我好姊妹夠哂吸引力。」山聰還表示今晚仲有親熱鏡頭，大家嘅心臓準備好未？頂唔頂得住先？