【叱咤】謝霆鋒上載綵排片段　Chef Lemon彈結他真係好熱血

《叱咤》頒獎禮已經圓滿落幕，不過大家有上網都知，好多人仲依舊瘋傳頒獎禮片段，特別係謝霆鋒及陳奕迅兩段表演更加係令人回味無窮。完show後唔止觀眾，兩位當事人都有update社交網站分享感受，Eason話自己：「都係有啲緊張嘅，上去呢個叱咤（舞台）…幾好吖，有啲腎上腺素嘅郁動。」至於霆鋒更上載一條綵排片段，仲話：「唔知點解，rehearsal 嘅演出永遠都係順過出場？！」

頒獎禮結束後Eason於Facebook上載訪問片段，被問到表演完有咩感受，佢就話：「都係有啲緊張嘅，上去呢個叱咤（舞台）…幾好吖，有啲腎上腺素嘅郁動…都算完整完成個演出咁囉！阿炳（琴師）好嘢，阿Jan又係好辛苦，阿Jan都好好嘢，佢嗰啲稿好難背，因為要夾Timing講嘢，都幾有壓力。我就最易囉，因為我企喺度唱歌咋嘛！」剛好呢個時間Supper Moment上台獻唱，Eason大讚：「佢哋好有Energy，真係覺得佢哋幾好，佢哋啲Energy Level好勁！」有歌神大讚，相信Supper Moment幾位成員可能仲開心過橫掃頒獎禮。