【「龍」過雞年】鄭中基曾想亞博開個唱︰觀眾嫌遠，都係紅館啦！
撰文：何志衡
出版：更新：
鄭中基事隔10年再在紅館開騷，將會叫埋囡囡上台表演。（梁碧玲攝）
Ronald演唱會在農曆年前後舉行，為遷就新年煙花，開騷時間每日不同，買飛前要留意。（梁碧玲攝）
新生代可能以為鄭中基只是演員，曾拍過《龍咁威》系列，只記得他是暴龍哥，其實鄭中基廿年前出道已是靚聲歌手，多年前曾在紅館開過個唱；今日他宣布為報答歌迷，2017年農曆年三十至年初二再於紅館開3場演唱會，預告會帶囡囡𢭃利是。
想開30場 「可惜得3日！」
鄭中基對上一次在紅館演唱會，已經是2008年3月與梁漢文合作的《港樂．鄭中基．梁漢文演唱會》，事隔9年再開騷，鄭中基就話好無奈，因為曾入紙7次紅館都說無期，直至最近在澳門開騷期間突然接到通知農曆新年有期。問鄭中基本來想開幾多場，他答：「紅館畀到幾多日就想開幾多場，30日咪30日，可惜得3日，想還飛債都有啲難。」他表示考慮過其他場地：「諗過機場博覽（亞洲國際博覽館），但外國人開就冇問題，香港歌手開觀眾就會嫌遠，都係紅館啦！」
他又透露爸爸鄭東漢會幫手彈結他，女兒Emma也想自彈自唱，現在女兒天天在作曲，但天天改動，所以暫時未知是否能成事。至於多年沒有新歌的他，表示和太極的Joey、Kevin Boy、LMF的老占已組成樂隊寫新歌，早前在台灣灌錄了一首國語歌，之後還會有廣東新歌在演唱會中演唱，餓了10年的歌迷有福了。