家裡上演《冰雪奇緣》 全因家裡養了牠 主人：好似兇殺案現場
大部份過去作為獵犬的品種，如比高犬、臘腸犬，精力一般都比較旺盛，主人需要經常帶牠們「放電」，要不然家裡鐵定會被牠破壞得一片狼藉。日前有位狗主人便在Facebook群組裡，張貼出家裡被狗狗破壞的慘況，情況就像「有賊入屋」，她更諷刺地問：「你養緊咩狗種呀？」
早前（11月27日）晚上，有一位狗主人在Facebook群組「HK Beagle Club (香港比高會)」發佈了一張照片，內容是片地白色粉末及破碎的碗碟，並寫上：「你養緊咩狗種呀？係beagle呀！」慘況猶如有賊入屋。
▼▼▼點擊圖片看阿布的所作所為▼▼▼
《香港01》記者致電狗主人阿寶了解事件發生的經過，她表示因天雨關係，近日沒有帶愛犬「阿布」外出散步，「因為呢幾日落雨，佢太好精力，結果我返到家就變到好似兇殺案現場咁。」
「我收工六點幾返到去，發現佢咬爛咗包生粉。」阿布走進廚房，翻開廚櫃咬爛了一包生粉，「我張床、地氈、雪櫃門，全個廳都有。啲生粉飄飄下，好似《冰雪奇緣》咁，佢好開心咁周圍踩、周圍撲。」
主人：好肉赤呀！
「佢扯到咩就咬啲咩，上星期買咗五隻羊肉睥畀佢做零食，佢已經食哂，仲食咗兩舊擦膠！」阿寶收拾好地上的東西，發現有兩塊擦膠不翼而飛，相信已經被阿布分屍。當晚九點，阿寶帶牠看獸醫，醫生處方催吐藥給阿布，經過一個多小時，阿布幾乎把當天偷吃的東西全吐出來，最後亦在嘔吐物裡找到擦膠的碎屑，阿寶無奈地說，「佢嘔到好似人哋飲醉酒咁。」
「佢一次過用咗我差唔多二千蚊。」阿寶指，醫藥費花了八百多、破碗破碟約五百多、零食約四百多，阿布這頓零食放題很昂貴呢！她激動地說道：「好肉赤呀！全部都係無印嘅碗碟嚟，激到我死喇！
曾咬爛15張狗床
「比高都係精力旺盛嘅狗，可以無限電、無限玩。」原來這並不是阿布第一次「犯案」，牠之前試過在籠裡，扯爛籠外的狗床，「阿布歲半嗰時已經咬爛咗15張狗床，不過呢啲都係碎料。」
「唯有勤力啲帶佢散步，不過都係一個好好嘅回憶嚟。」阿寶指出，不時在比高群組看到主人撰文悼念已逝去的比高犬，「我寧願佢繼續百厭，都好過佢唔喺度。所以我鬧極佢，都唔會話唔要佢。」每次阿布搗蛋都會令到阿寶非常生氣，不過每次當她回想起精力旺盛的阿布，都會令她會心微笑。