【每逢大事講故事】由special relationship變it's complicated!

撰文:
最後更新日期:

國際關係看似錯綜複雜風雲詭譎,其實如果將人物關係套入大家熟悉圈子入面,其實唔難。回帶少少回到校園時,假設你讀一間國際學校,同學仔來自五湖四海,通常你會同坐得近啲或者同聲同氣的人Friend啲,甚至自組黨派,維護「自己人」利益,對外人蝦蝦霸霸。好喇有一日,你突然要離開呢個組織,「被杯葛」就係梗局,喺呢個時候,有個超級有錢阿爸又係校董嘅同學殺出嚟,仲同你講:「我哋關係好特別」!嘩,比着係你,都唔理三七廿一黐咗埋去先講啦下話,點理得佢唔靚仔口臭兼無品呢。

飛雲講緊嘅,咪就係啱啱去完白宮,同女人公敵侵侵拖晒手仲襯埋衫嘅英國首相文翠珊(Theresa May)囉!阿May姐上位之後只有一個任務,就係處理脫歐(Brexit)問題,雖然任務只得一個,但呢隻熨手山芋可謂非常十分極之棘手,一個唔該立即人頭落地,就係咁,佢唯有連侵侵呢件人神共憤嘅華盛頓狼人都要頂囉。

你睇你睇,世紀拖手時May姐笑容幾咁牽強?!(Getty Images)

特朗普當選美國總統後,動作多多,其中一件事就係打電話邀請May姐到白宮。佢肉麻地叫阿May做「我的瑪姬」(My Maggie),將兩人關係跟前美國總統列根與英國首相戴卓爾夫人嘅深厚情誼相提並論,列根會親切地叫戴卓爾夫人的小名Maggie,侵侵似乎想有樣學樣。

侵侵打電話比May姐果陣,會唔會學Leon咁講:「阿May,你點呀?」

(網上截圖)

講佢就天下無敵,做起嘢上嚟又點?咪就係出事囉!勢估唔到,唔單止香港果位老翻「白宮發言人」成日開口夾着脷,正牌白宮辦公廳一樣撞板,都唔知邊個剋邊個。英國首相到訪,發出來份新聞稿連May姐個名都串錯,成篇都將文翠珊個名Theresa May,串錯咗做Teresa May。

白宮新聞稿將May姐個名Theresa,全部走晒個h字,真係出事。

好衰唔衰,原來Teresa May真有其人,係一位已退休的英國脫星。𤓓到一個點,做咩都無用,咪瘋狂被人在Twitter串囉。見微知著,侵侵同佢班白宮手足有幾重視佢今趟到訪,May姐唔使飛雲講都心裡有數吧。

白宮誤將脫星阿May,當作首相阿May,有心定無意先?(RTUK)

講身材,堅.May姐都唔輸蝕,你睇前財相歐思邦睇得幾專心?(網上截圖)

為咗同侵侵呢個大財主同學打好關係,呢啲咁無禮嘅嘢唯有扮睇唔到,仲專程「精心挑選」咗一份禮物送比侵侵,到底係咩呢?登燈瞪凳,咪就係香港人交換禮物時最唔想收到第一位嘅杯囉。唔好鬧住,May姐送呢隻並唔係普通水杯,而係一隻蘇格蘭傳統象徵友誼的雙耳小酒杯Quaich(讀音為Quake)。一來強調雙方友誼,二來侵侵有位來自蘇格蘭的媽媽,呢份禮物都算幾有心思㗎喇。

呢,查理斯王子手上攞住果隻,咪就係Quaich囉,絕對唔係普通水杯嚟嘅。(Getty Images)

點解咁講?因為May姐送比特朗太梅拉尼婭個禮物籃,更加無厘頭,裡面有蘋果汁、果醬、手打餅乾和杏仁果醬餡餅(Bakewell Tarts)等清一式英式食品,啱唔啱口味係其次,可能純粹飛雲心邪,但呢個果醬撻橫睇掂睇點解都好似影射緊曾經拍裸照嘅梅拉尼婭咁嘅?

比着你係梅拉尼婭,收到呢個撻,你會點諗?(網上圖片)

(網上圖片)

 

政治Bromance始祖:羅斯福+邱吉爾

查實美國同英國好像總是形影不離,常常公開強調佢哋In a 「Special Relationship」,表面睇,係因為根源上兩國同文同種,實際上梗係出於現實需要啦。不如回到那動人時光睇睇:二戰期間,羅斯福同邱吉爾成功合力對抗納粹,公事以外,佢哋早在二戰前已相識多年,最初關係麻麻,點知搭落有味,越來越老友,發展出一段兄弟情(Bromance),二戰期間互發近2,000封書信,共處130多天,不時在羅斯福位於紐約海德公園的住所一起喝威士忌,羅斯福間中又被邱吉爾拉去摩洛哥度假。邱吉爾其後承認:「我會深入研究羅斯福每一個細微思想轉變,沒有任何戀人會像我這樣研究他的情婦。」(No lover ever studied every whim of his mistress as I did those of President Roosevelt),元祖Hehe真係唔係浪得虛名。

Bromance又點止奧巴馬+拜登,你睇羅斯福+邱吉爾頂帽同煲呔襯到?!(Getty Images)

二人的Bromance古仔層出不窮,最搞笑的莫過於某次邱吉爾在白宮過夜,半夜羅斯福忽發奇想要第一時間告訴對方,叫助手推他到首相的房間,點知輪椅去到邱吉爾間房,看到剛剛出浴的邱吉爾一絲不掛,羅斯福尷尬得想掉頭走,邱吉爾卻坦蕩蕩地說:「大英帝國的首相沒有任何東西要對美國總統隱瞞哦。」

羅斯福與邱吉爾二戰期間互寫近2,000封信,雖然無封封寫滿600句的我愛你,但也情誼非淺。(Getty Images)

因二戰關係,羅斯福前無古人、後無來者咁做左4次總統,於是佢特別在1945年2月舉行嘅雅爾達會議(Yalta Conference)中,將慶祝他第四次就職典禮的紀念金牌,送咗一個畀邱吉爾,唔啱傾還唔啱傾,有份打納粹嘅史達林,佢同樣有送呢個金牌,真係敵人的敵人就係朋友。

可惜羅斯福兩個月後便離世,令呢段波瀾壯闊的兄弟情告一段落。他們沒有及時許下任何諾言,可是邊一個人可以否定呢段感人至深嘅關係?正因為咁,就算美國總統換成杜魯門,已離開唐寧街10號、以平民身份1946年在美國發表演說的邱吉爾,仍要強調英美兩國有着「特殊關係」(Special Relationship),卸下相位依然要為英國攬實美國呢個有錢同學,從此成為雙方領袖的祝福與包袱。

♫♪「常在霧裡燈孤單靠在墓前看着你的名字,假使再共你相見,只得冰冷舊照片……」可會是邱吉爾當時心聲?(Getty Images)

 

政治Soulmate:列根+戴卓爾夫人

到冷戰時代,英美有着蘇聯呢個共同敵人,加上同樣堅信自由經濟主義,令列根同戴卓爾夫人Friend過打Band,由1975年首次會面起一撻即着,曾為戴卓爾夫人撰寫自傳的資深記者Nicholas Wapshott稱:「他們幾乎在所有事情持相同意見,甚至令對方想法更完整。」呢隻仲唔係蘇眉?Sor,應該係Soulmate至啱。

列根與戴卓爾夫人唔止啱傾,仲會飲飲酒、跳跳舞。(Getty Images)

至1981年列根就任總統後二人首次官式會面,戴卓爾夫人已經講:「你嘅問題即係我嘅問題,當你需要朋友嘅時候,有我們在」,非常豪氣,而且「鐵娘子」言出必行,後來列根受美國政府秘密向伊朗出售武器的「伊朗門」事件備受批評,她立即飛到他身邊,還獨排眾議公開露面力撐老友,令列根政府上下感激不已。

佢地Friend到一個點,被改圖為《亂世佳人》主角,不過其實係串緊佢地搞到世界大亂。(網上圖片)

政治上縱偶有分歧,但大體上兩人老友鬼鬼合作無間,出親記者會仲會夾埋Dress Code襯到絕,互送禮物當然啱心水得多啦。咁啱得咁橋,戴卓爾伉儷送給列根其中一份禮物,又係杯。這對銀杯外面,一隻刻有代表列根名字Ronald的「R」,另一隻刻有代表列根太太南茜的「N」,裡面分別刻有「瑪嘉烈及丹尼士戴卓爾敬贈」(With love from Margaret and Denis Thatcher)。列根遺孀南茜去年逝世後,呢對杯被拿到佳士得拍賣,估值1,000至2,000美元,結果成交價去到5.2萬美元,高咗幾十倍,可見收藏家也認為呢段特殊關係「有得炒」。

杯,全部都係杯!戴卓爾伉儷送給列根伉儷的友誼見證。(佳士得網站)

 

牛津Buddy:克林頓+貝理雅

同樣在70年代讀過牛津嘅克林頓同貝理雅,都是二戰後出世,在類似社會背景下成長,又係天生啱嘴型。兩人之間任期只有四年時間重疊,但很快便一拍即合,叫對方做老友(bud, mate),當克仔知道貝理雅太太彭雪玲懷孕後,叫貝理雅做「嗲哋」,自動請纓可以幫手湊仔,還分享疑似有味笑話。

克仔口輕輕話幫貝理雅湊仔,不過佢好似對人哋老婆興趣大啲。(網上圖片)

話說某次克仔打電話給貝理雅,劈頭便說:「我的伙記要我拿着香蕉才讓我打電話給你,所以我現在拿着一隻又大又醜陋的啡色香蕉,坐在這裡。」

 

小布殊:Yo,我哋用高露潔牙膏!

克仔無論有多好,對渴望出戰伊拉克的貝理雅嚟講,小布殊才是親密政治盟友。兩人首次會面後開記招,互相吹捧一輪之後,有記者問到兩人有何親密聯繫,小布殊竟然答:「我哋都係用高露潔牙膏」,向來轉數高嘅貝理雅隨即還擊:「喬治,現在他們會好奇你為何會知道」,令幻想空間無限擴大。

因需要而結合,咪就係小布殊同貝理雅呢隻囉。(Getty Images)

不過克仔又好,牛仔小布殊又好,貝理雅在二人身邊,總似是隨從多過朋友。因為英美國力越來越懸殊,貝理雅緊緊跟隨美國的政策,令他得到「跟尾狗」這類不光彩稱號,而他跟隨小布殊聯手出兵伊拉克,亦讓他蒙上政治污點。

 

奧巴馬冷對白高敦

奧巴馬在重大金融危機中上場,首要任務係處理國內經濟亂局,完全唔得閒同英國再搞乜鬼特殊關係。想當年白高敦去見奧巴馬,費盡心思挑選禮物──用咗成萬英鎊買一件由維多利亞年代反黑奴英國皇家軍艦格納號(HMS Gannet)船身木材製造的筆座,正好與白宮辦公廳來自該艦艇姊妹船的橡木圓桌配成一對,又可以向身為黑人的奧巴馬示好,另附上全套邱吉爾自傳,提示英美兩國的特殊關係,可惜……

奧巴馬:「其實DVD都唔係好差姐,我忙吖嘛!」白高敦:「Er......」(設計對白)(Getty Images)

充滿受害者氣質嘅佢,收到嘅回禮慘不忍睹。你估都估唔到,奧巴馬係送左一套有25隻美國經典電影DVD盒裝比白高敦,包括《ET》、《綠野仙踪》,衰到好似喺白宮精品店求其揀件咁,一啲誠意都無,而且套DVD嘅格式,喺英國係播唔到嘅。去到呢度,唔需要係明眼人都Feel到呢段曾經特殊嘅關係已經無乜特別。

 

當女權分子遇上女人公敵

講咗咁耐,只係想講,英美之間,無論元首私底下幾friend都好,大家始終利字當頭,以本國利益行先,令佢哋嘅special relationship硬係增添一份it’s complicated說來話長一言難盡嘅複雜意味,唔通你估真係好似白花油王子咁,唱句歌仔就:「來簡約地 愛多80年 態度未曾改變」咩。所以May姐呢位出晒名嘅女權分子,同不斷侮辱女性嘅女人公敵侵侵,兩個思想上大纜都扯唔埋嘅兩個人,都可以坐埋一枱傾生意。

May姐呢位女權分子,同侵侵呢件女人公敵有講有笑?你唔係信呀?(Getty Images)

英國勢被歐盟國家Unfriend,友情告急嘅阿May喺聖誕節後經已寄咗封信畀侵侵,並附上日本偷襲珍珠港後邱吉爾向美國人打氣嘅演辭副本。侵侵立即心領神會,對外宣布讓英美回復昔日的特殊關係(Special Relationship),最初提出英美Special Relationship嘅,咪就係前面提過嘅邱吉爾囉。 呢啲戀人級數嘅眉來眼去,唔係人人頂得順。侵侵擺明車馬當美國係盤生意咁做,阿May講明英國向來係商人國家,姣婆遇着脂粉客,單刁傾成只係時間問題。

所以話,全部政治家啲戲都好好。齌睇呢張相,唔講仲以為May姐同侵侵堅係Friend。(Getty Images)

做開生意嘅侵侵,清楚知道阿May需要啲咩,講明會盡早跟英國簽定「又快又公平」嘅貿易協議,仲話佢阿媽係蘇格蘭人,非常崇拜英女皇,又讓阿May成為自己入主白宮後首位到訪外國元首,面子裡子畀到足。

兩人見記者時,May姐專登以紅色套裝襯侵侵條紅領帶,經過白宮走廊時還因為一條「看不見的障礙物」拖了一下手。好像生怕侵侵會亂說話的,記者會只有短短18分鐘。面對呢位永遠不按牌理出牌的有錢同學,可憐May姐不斷幫侵侵重申美國支持北約、反對俄羅斯霸權、共同擁抱自由價值觀云云,自戀嘅侵侵一於少理,只顧將同阿May共晉午餐的餐單遞給助手,吩咐佢「好好保管住,我曾跟英國首相共晉午餐」,好似啲人拍拖要將戲飛keep起來咁,睇嚟呢4年有排佢玩集郵。

無辦法,為咗同國民證明,無咗歐盟,英國一樣唔使驚,仲有隻鷹喺大廳!為咗美國呢位財大氣粗嘅同學,阿May唯有蝕底啲忍辱負重同侵侵扮Friend子。阿May有咗美國呢件秘密武器,拆Brexit呢粒炸彈會得心應手好多,至於咁大份禮鯁唔鯁得落,定係會被侵侵呢隻狼鯁返轉頭,真係要密切留意下回分解喇。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。