毛記所秉持的其中一種理念，係「真．香港人」。（實惠）管理層能夠掌握這脈搏，敢於接受這共同身份，仔細考慮風險得失，進一步計算接下來可能面對的風風浪浪，再決定是否投放逾300萬去做這次marketing，也是少點勇氣也不行。

非正式統計，昨夜FB最多人急速畀Like專頁，叫實惠Pricerite。

因為她明張目膽地，冠名贊助毛記電視台慶，雖然show未開，不過已經夠先聲奪人。效應有幾強？該專頁上一個post只得80個like，6小時後專頁分享100毛台慶預告片鏈結，至今已有逾2000個反應，like又有笑又有，唔使識計reach同view，要向上司交數完全無難度。

咁當然，要夠膽贊助今次盛事，既考驗了實惠公關及市場營銷團隊的努力與判斷力，也挑戰了公司管理層是否緊貼大眾取向，同時有敢於面對部份人將指責其「歸邊」的勇氣。

講前者，家陣經濟市道差，搵贊助難，企業限米煮熟飯地畀贊助亦難，而要說服可能堅離地、只信保守平穩唔做唔錯一套嘅老鬼就更難。做公關或市場營銷者，無論自己有咩立場同喜好，始終都要將效益放在天砰上算算數，做會點唔做會點，咩年齡職業客人會增加減少，有無機會畀人狙擊抹黑……

卒之計完條數去面聖，又要喺「忠言逆耳」同唔做「Yes Man」之間好好平衡，說服領導層接受一次有風險（或者無，要問實惠）的投資，團隊要做嘅功夫同責任其實唔少。

至於管理層，雖然話係做生意打開門口見人，但係有無緊貼市況同風向，真係一門修行。當今公眾重視嘅，係企業有沒有承擔與良心，有沒有一套跟他們共有的價值觀同理念，透過呢道張力，先可以喺企業同公眾之間架設一道溝通嘅橋，比起硬銷，Perception Management才是皇道。

毛記所秉持的其中一種理念，係「真．香港人」。管理層能夠掌握這脈搏，敢於接受這共同身份，仔細考慮風險得失，進一步計算接下來可能面對的風風浪浪，再決定是否投放逾300萬去做這次marketing，也是少點勇氣也不行。（別以為當中每步係易事，如果你有個藍絲老豆，你會懂）。

所以，嗰2000多個反應，真係有血有淚有代價。期望毛記可以做過GOOD SHOW 畀大家。

題外又話說，有件「曾被接觸人士」（喂消息人士咪消息人士囉，被接觸係點接觸？用手定下體？）同HKG報講，有人正安排明刀明槍針對贊助毛記的商品客戶，包括網上負面宣傳、杯葛及投訴行動等等。觀乎對方過往「賽績」，凈係一單全力支持喜記就知道，有時收錢做嘢，唔見得一定有料，刀手也有孱弱的。

（本文純屬作者意見，不代表香港01立場。）