災場前自拍兼「成功爭取」？民建聯，你漏咗支旗呀！

即係咁，要影車頭相，自己另外去搵架垃圾車又好咩車都好，唔該唔好阻住人哋消防車好冇？現場啲水係用嚟救火，唔係用嚟畀你哋攞嚟抽嘅…柯創盛喺FB post相更加不忘民建聯傳統，寫明向民政處「成功爭取」安排社區會堂畀居民安頓…對民建聯嚟講有咩本身存在嘅野，係唔可以「成功爭取」先？咁所以，「匯報」意思係，佢哋四個人嚟過打卡，仲不停圍住人去「了解情況」，係爭在無係消防車刻「到此一遊」啫。

筆者喺度先向高級消防隊長張耀升致敬。RIP。

火災無情，奪去咗一條寶貴生命。偏偏總係有啲人，習慣喺傷口上撒鹽，為自己製造另一場災難。

打開FB，民建聯四位非淘大當區嘅區議員，包括張琪騰、‎柯創盛、歐陽均諾同張姚彬，尋日喺消防員疲於奔命救火嗰陣，佢哋就忙住喺災場指指點點指手劃腳——雖然，無人知佢哋實際幫咗啲咩；而更重要嘅係，佢哋不忘喺現場影合照打卡，就喺消防車附近，大馬路中央旁若無人咁拍。而張姚彬就係FB話：「區議員到場了解情況，影相向市民匯報好正常。」

現場影相阻救援　到此一遊式匯報　曝光只為谷人氣

即係咁，要影車頭相，自己另外去搵架垃圾車又好咩車都好，唔該唔好阻住人哋消防車好冇？現場啲水係用嚟救火，唔係用嚟畀你哋攞嚟抽嘅。

影相，係正常，只要人喺災場外而人身安全唔受影響，攞部手機出嚟影相、拍片都係唔少人嘅習慣。之但係，四位，你哋好幾個拍照地點，係喺救災範圍內喎，係喺消防員工作嘅路徑之上，唔係完全唔影響佢哋嘅工作流程嘩？唔好彩講句，樓上跌舊石屎落嚟，消防員係要花時間救番你四條友出嚟，有無諗過自己係幾咁阻住地球轉？

用相片向市民「匯報」，係「匯報」啲咩呢？喺呢個情況，就假設人人都唔睇即時新聞，係鍾意睇你四個外區嘅FB，咁我諗大家想知嘅，會係個火勢發展、傷亡數字、現場安排、交通情況呢啲最貼身事嘅係咪？

而佢哋「匯報」見得最多嘅，唔係第一身大火同車龍相，而係四位多角度嘅尊容。柯創盛喺FB post相更加不忘民建聯傳統，寫明向民政處「成功爭取」安排社區會堂畀居民安頓。雖然呢樣嘢本身就係正常安排，但係企鵝都可以「成功爭取」啦係咪？對民建聯嚟講有咩本身存在嘅野，係唔可以「成功爭取」先？

咁所以，「匯報」意思係，佢哋四個人嚟過打卡，仲不停圍住人去「了解情況」，係爭在無係消防車刻「到此一遊」啫。That's it.

如果講到真係要向選民同市民問責匯報，民建聯點會咁迅速，畢竟潛水先係強項。就好似早排嘈過嘅1億元音樂噴泉計劃，觀塘區唔少居民都反對，地區組織「東九龍社區關注組」曾經逐一致電觀塘區議員問佢哋取態，結果有18個區議員笠水唔答，其中呢，咪正正包括張琪騰同‎柯創盛囉。

結果，所有借口都係假，講到尾咪又係公關宣傳谷人氣。做政治嘛，大家都明，做政治要撈油水爭人氣，特別臨近9月，四個之中柯創盛又話要選立會，呢啲時間自然要爭取曝光，如果只係講呢點，你哋就更加抵畀關公斬啦。

影幅相不等於有做嘢　置身事外宣傳更惹反感

 　1. 想宣傳自己有「做過嘢」，咁影幅相可以證明啲咩？我企喺個救護站前面打一句「成功爭取」就自然會有說服力？宣傳嘅手法本身就錯咗。

 　2. 退一步講，假設支持者相信自己真係做到嘢，成功建立「正面形象」，咁就面對一個實質問題：代表藍田油塘啟業區嘅區議員，走去淘大「做嘢」，佢唔係應該向本區問責咩？點解唔叫淘大支持你，不如你下年空降嗰區？

 　3. 又再假設支持者可以接受四條友「大愛無疆界」，你都犯咗宣傳大忌：喺自身幾乎置身事外嘅情況下，以災難作宣傳工具。

坦白講，唔少名人、有錢佬、明星、大機構，係災難發生時出錢出力，當然有出於善意嘅偉大，但當中亦有人或者機構係有brand building嘅考量；特別係當今世代──觀感管理──即係大眾對品牌嘅印象係公關重要一環。透過主動參與救助、支援同捐款，潛移默化唔搶疆咁建立機構正面形象，都可以算係危中有機嘅衡量。

而民建聯本身就係觀感管理最佳嘅反例子。簡單嚟講，即係做乜都先打咗三折先，而喺災場上不但完全無直接有幫助嘅行為，喺傷亡下仲要自拍留念，無形中畀人「只係用災場做宣傳」之感，更進一步破壞大家對民建聯呢個品牌嘅道德觀感，對品牌以至自身嘅傷害更高。

所謂CSR，其實唔係咁易刷經驗值嘅。

幾大嘅災難　做幾大嘅show

有句說話係咁講嘅：「係共產黨統治下，有幾大嘅災難，就可以做場幾大嘅show」。遠嘅唔講，上年深圳大規模塌泥事故，救援人員就喺災場攞住支共產黨黨旗大合照同敬禮的照片，你就知道比起咩「黃金72小時」，selfie歌頌真係好重要。

所以呢，與其俾人話唔做嘢，你四個應該無時無刻帶住支共產黨黨旗。每逢自拍都拎出嚟揮舞，咁至少都會有一班愛國人士更加追捧你哋，一個唔覺意得到西環人注意，9月入立法會仲點會係夢？

（本文純屬作者意見，不代表香港01立場。）