開香檳慶祝A&F撤出香港
A&F撤出香港?官方答案係零售市道不景,同埋捱貴租。我?我不知幾想開香檳慶祝…理由好簡單,A&F就係一間經營不善嘅公司…市好時固然可以搞下噱頭,搵啲猛男去中環抱抱,大把女士唔介意走光露底。巴菲特話齋,而家潮退,就到A&F露底了。以下同大家研究下佢嘅底。
話說港大有科BBA(Account & Finance),簡稱A&F。當年我哋對住啲女同學,講得最多嘅爛gag就係讀A&F嘅唔會著A&F。正如我哋話去Forever 21嘅梗係唔係Forever 21嘅人。
A&F撤出香港?官方答案係零售市道不景,同埋捱貴租。我?我不知幾想開香檳慶祝。對,我全不掩飾對A&F嘅厭惡同鄙視,至怕嗰堆又音樂又香水嘅舖,都唔知做乜春。你絕對可以話我崩口人忌崩口碗,人哋老細話只要型男索女,唔想啲樣衰亞洲肥仔著佢嘅衫。嗯。咁但我寫得文,梗係唔係講佢歧視樣衰亞洲肥仔咁簡單。
理由好簡單,A&F就係一間經營不善嘅公司。點得到呢個結論?同其他公司比咪知。早排篇博評寫過,國泰千夫所指,客人鬧股東鬧員工又鬧,被人戲稱為「因航」,但其實係行業不景,多過自己經營不善。相反,A&F就真經營不善。市好時固然可以搞下噱頭,搵啲猛男去中環抱抱,大把女士唔介意走光露底。巴菲特話齋,而家潮退,就到A&F露底了。以下同大家研究下佢嘅底。
邊個唔捱貴租? 佐丹奴莎莎也不如
貴租,邊個唔捱?做零售做快餐邊個唔捱貴租?零售不景,淨係你啲衫冇人買?Forever 21,COACH同GAP都先後退租,對不?但你可以望下呢3間公司,股價呀盈利呀,絕對冇A&F咁水深火熱(Forever 21冇上市就冇得睇)。
A&F,表面風光,好似國際大品牌好有型,但賺唔到錢乜都假(A&F唔講賺錢唔通講藝術?)而家A&F嘅規模,同你好熟悉嘅佐丹奴(709)莎莎(178)差不多!有冇作大?數字唔呃人,你望下佢哋一年分別賺幾錢,同埋3間公司幾多市值(下面我會再講)。
股票編號 | 股價 | 頂峰股價(約數) | 跌淨幾多? | 現今市值 | |
(A&F為美元,其他為港元) | (%) | (億港元) | |||
A&F | ANF | 15 | 70 | 21% | 70.2 |
莎莎 | 178 | 3.32 | 10 | 33% | 97.4 |
佐丹奴 | 709 | 4.11 | 8 | 51% | 64.9 |
*以上為截至香港時間2016年11月22日晚之股價 |
望下A&F個股價圖,頭半截同N咁多公司一樣,千禧年後利潤升股價升,金融海嘯插水,然後反彈。但去到2011年,就同其他公司好唔同了。嗰一年A&F股價見頂,然後拾級而落。當時頂峰70蚊,而家15蚊,得返20%,五分一左右(我已經好厚道,冇用海嘯前嘅80蚊比)。
噢,之唔係嗰一年,A&F用天價700萬月租租咗個舖咯,簽到2020添(剛剛就賠一年半租提早終止),業主霍英東班後人攬住佢嚟錫。當然一張租約唔會拖低成間公司,但至少話畀你知公司係幾咁「進取」。
Fashion嘅嘢我識條鐵,但數字唔呃人。A&F跌極都有,而家市值70億港紙左右。真係僅僅大過間佐丹奴(65億)少少,而細過間莎莎(97億)。
點解係咁跌?市場好現實,因為賺唔到錢咯。A&F近兩季都蝕錢,之前兩年亦不過係幾億港紙純利。即係點?即係莎莎同佐丹奴,過去呢幾年,任何一個時段都賺錢多過A&F。講absolute amount喎!對,一間所謂國際公司,賺錢根本不如土炮莎莎佐丹奴(咁當然,莎莎佐丹奴都有海外業務嘅)。
賴貴租賴零售放慢?係吖,莎莎佐丹奴一樣捱貴租一樣受零售放緩影響。之但係,莎莎而家股價差不多係52周新高,佐丹奴亦都係。對,同good old days 最頂峰時比仲差好多。但頭先講過,A&F股價跌淨20%(五分一)。莎莎同高峰比都仲有三分一,佐丹奴直頭有一半。而A&F今年頭兩季已蝕幾億港紙,莎莎佐丹奴都仲賺緊錢。得你捱貴租?
冇人拎支槍逼你租貴舖
OK,梗有人出嚟話,不能直接比較,拎高檔嘢同低檔嘢比。首先我唔知道70億港紙市值嘅公司可以有幾高檔。不過堅持比較的話,文章一開頭已經提到, COACH同 GAP?你望下人哋盤數,同埋個股價,就知A&F真係技不如人。COACH一樣交7百萬租一個月,但人哋食得起。或者其實都係消化不良,但人哋底子好,唔使見血。
A&F個舖位好似仲未有新租客,但Forever 21、COACH兩個舖位,分別由Victoria's Secret同Adidas租返,當然租金係原本一半左右。咁人哋咪舒服好多。
我知,分析員而家馬後炮梗係易。2011年咁旺,業主揀租客嘛,要你簽到2020先制,唔瘋狂搶租唔到嘛。咁但,真係冇人拎支槍逼你去租的。咁有人要威要型,就股東埋單咯。股東,就當然最後要管理層問責。
不過話說回頭,2011年某日同某香港服裝品牌CEO傾開,佢都講起A&F同Forever 21租鋪,佢話稍為有啲常識都知冇可能計得掂數。但人哋志不在此,只係當賣廣告。但都係嗰句,量力而為,人人賺錢你蝕錢,十分難睇,好難賴大圍因素。捱貴租?可能啦,但都有人係冇咁進取有人摸正個頂。
價值觀同特朗普不謀而合
而家睇返,高人有其道理,A&F除咗退租香港間舖,亦都會摺埋在首爾間旗艦店,美國更加係幾十間咁關閉。咁在邊開鋪?梗係在大陸!對,個諗法可能係,在香港捱幾年貴租,當賣廣告,然後返去大陸開——反正租平過香港好多。
一代美國品牌,海明威羅斯福艾森豪威爾柯德莉夏萍嘅品牌,最後都係睇大陸。但亦無法子,你接唔接受都好,香港係個唔好做嘅市場。對,Lancome母公司L'Oreal在香港人話杯葛後冇耐,股價創新高添。
最後補多句, 斷估A&F都唔會估到特朗普做總統。A&F近年成日畀衛道之士由朝鬧到晚,除咗文首講過嘅「唔要肥人醜人」外,仲有話佢啲廣告露骨, sexism,公司歧視非白人員工,將女性商品化,政治不正確等等。咦?呢堆價值觀咪同特朗普不謀而合?反左膠反大愛反全球化,分分鐘A&F在美國有得復興。Just saying。
(文章純屬作者意見,不代表香港01立場。)