【預算案】發展金融科技，財爺你要知…
財爺今次終於大篇幅提到金融科技，推動金管局、證監會及保監處設立專用平台，絕對是好事。但在發展初期，小妹有幾點想提提品客先生…
睇品客先生的財政預算案，小妹作為中產的一分子都算笑得出，一來退稅、增加免稅額真係幫荷包慳返筆；二來呢份相對唔離地，我覺得真係寫畀香港人睇的預算案，認真回應了小妹一直的「訴求」──發展金融科技創新。
有睇開小妹文章的，都知道我不下一次希望香港發展金融科技。所謂金融科技，即電子支付、股權眾籌crowd funding、大數據分析big data analysis及個人對個人貸款P2P等。
我說過，這些金融科技早已顛覆不少傳統生態和生活模式，例如：在內地過年在微信收利是、食飯搭車交停車場費等都可以用手機或QR code支付。P2P平台雖然為內地股市帶來亂局，但其急速發展打破了銀行作為百業之母的地位。財爺今次終於大篇幅提到金融科技，推動金管局、證監會及保監處設立專用平台，絕對是好事。但在發展初期，小妹有幾點想提提品客先生：
1. 香港金融監管保守，局限發展
證監同金管局有幾嚴，相信是金融界朋友人所共知的事實。以我所知，有不少financial engineer提議過發展不同類型的創新型產品和服務，都被監管機構ban咗。
小妹唔係話要反對監管、反對保護投資者，但過嚴的規矩的確窒礙了金融創新。以上年港股大時代為例，有證券行容許客戶以WhatsApp落單，急急被證監會叫停。當然做法可能違反規定，但我想問，當WhatsApp通訊已同電話通訊無異的時代，點解落盤用電話就得，WhatsApp唔得？證監規例係咪太out？ 監管機構點攞到中間點，對金融科技創新好重要。
2. 創意氛圍很重要
金融業本身是高門檻行業，但科技可以令兩個廿幾歲的後生仔，都可以憑創意搞一間金融科技start up。小妹去過北京中關村，創業氛圍相當濃厚，幾個人在間cafe傾嘢當office，就搞出一間公司來。相反在香港數碼港、科學園，你有幾何見到有幾個IT個體戶聚集，同志同道合的人傾下大計？所以想金融科技成為預算案所講的「新經濟」，必須先創造氛圍。
3. 香港人要快！
以我觀察，因為慈母國在金融科技發展快，香港反而成為他們很希望開拓的市場。例如香港微信最近推出在內地已流行多時的錢包功能，支付寶在香港發展亦愈來愈快。中資財團財厚，又有在內地發展經驗，香港人想靠自己搞金融創新，你唔同佢鬥快，一定無得玩。
即使香港的金融科技起步已落後，但有心唔怕遲。我同品客先生一樣，相信香港人唔洗「一帶一路」都可以成功行出自己的路！
【編按：筆者為八十後財經公關，大Deal細Deal通通做，business trip出唔完，新聞稿寫唔晒，但見盡銀行家、公關傳媒界的奇怪異事。】
（本文純屬作者意見，不代表香港01立場。）