【美食車】燒魷魚檔轉戰中環海濱「死位」 推$1優惠「翼」市求生

撰文:梁煥敏
出版:更新:

美食車先導計劃已「開車」近一個月,各試點已有陸續有美食車進場營業,經過首兩星期試行,有檔主表示終極「死位」為中環海濱活動空間,由於人流極少,有檔主一日只錄得不足900元營業額。以「神級燒鮮魷」為招牌菜的豪園小食美食車,將於下周二(7日)轉到中環營業,負責人梅樂文不被環境所限,想出宣傳妙計,預告將以一蚊一隻雞翼作招徠益中環OL:「明知中環好弱,既然都要去就事先準備啦,我要逆境中諗下辦法!」

現正於尖沙咀藝術廣場停泊的豪園小食,將於下周二(7日)與七桌子X樺得園轉戰中環。(梁煥敏攝)

中環「死位」冷清 美食車日賺900元

美食車先導計劃有8個停泊點,其中中環海濱被稱作終極「死位」,曾於此擺檔的「大師傅」美食車負責人黃偉文曾呻人流不似預期,平日只錄得900元的營業額:「我都唔落去睇啦,分分鐘職員都已經悶到訓著咗!」

《香港01》記者於上周四(23日)曾到訪中環試點,下午時段每小時只有不足10人經過,停留的數小時間,僅不足10人前來幫襯,黃昏時份只有少量黎明「粉絲」路經及觀賞演唱會綵排(註︰黎明2月24日於中環海濱開露天演唱會),人流才有輕微增加。「大師傅」職員無奈地說:「我哋都無辦法,今日都只係900蚊(營業額),如果黃(先)生見到,跳海都似,佢唔嚟好啲!」

豪園小食將有新推介,以一蚊一隻「一字骨雞翼」作招客。(受訪者提供圖片)

一蚊雞翼 每名食客最少買8隻

下周一(6日)美食車「大執位」,豪園小食將由尖沙咀轉戰中環海濱活動空間,鑑於前人經驗,豪園小食不甘「未打先輸」,想出一蚊一隻「炸一字雞翼」作招徠,每名食客最少要購買8隻及最多16隻,希望可吸引中環打工仔及一眾OL「遠征」海旁購買。

梅樂文說:「(中環)可能會吃力,希望唔好蝕啦!明知中環好弱,既然都要去就事先準備啦,我要逆境中諗下辦法,起步要有信心!雞翼大家食完都鐘意,我就喺嗰度(中環)做優惠。」

問到一蚊一隻「炸一字雞翼」是否蝕住做。梅表示情況應該尚可接受。豪園小食於黃大仙廟外「開車」首三日曾推出自由定價燒鮮魷魚,吸引不少街坊試吃,最終定價每條魷魚58元。

現停泊於中環海濱活動空間的「大師傅」,上周四(23日)至下午5時始有較多食客到埗試吃。(梁煥敏攝)
豪園小食於首日開張曾推出自由定價燒鮮魷魚。(資料圖片/梁煥敏攝)