九個中五、中六的小伙子，唱盡學業、校園及政治原創歌曲。堅信樂壇應有來自青少年的聲音，不抗拒談政治。由Big Boys Clus改名至Boyz Reborn，亦由最初的歌唱組合變成樂團；當時翻唱《問誰未發聲》的小男孩轉眼長大，Boyz Reborn在成立的第五個年頭，於蒲吧及九展開設兩場演唱會。

Boyz Reborn 12月23日及29日將於蒲吧及九龍灣展貿中心開演唱會，有別於過往演唱會，今次Boyz Reborn首次「擔大旗」。對於首次在無其他組合合作下「開騷」，各人特別認真，「會想畀人睇我哋唔係玩玩吓，我哋係認真去玩音樂」，鼓手Sam說。各成員仍是學生，Sam更是應屆文憑試考生，面對下月的演唱會，經理人Eddie為免打亂同學們的學習日程，練習均選擇在星期六朝二晚十進行。

伸延閱讀：七萬元贊助禁唱政治歌 　中學生組合Boyz Reborn企硬叫喚良知

Eddie感觸亦深，形容Boyz Reborn各成員「愈玩愈認真」，「好多人覺得我哋只係班細路有興趣咁唱吓歌，但我哋好想畀人知道，我哋唔係淨係玩玩吓」。由MV畫面至歌曲質素，Eddie均希望可給予市民專業形象，「話畀人聽Boyz Reborn都係一隊Indie Band（獨立樂隊）嚟，唔係兒童合唱團」。

代表青少年發聲，故主題是「The sound of youth」。Keyboard手阿佳指，年輕人聲音現時不被重視、亦不能夠被完全反映「青年事務委員會居然係劉鳴煒做，咁你就可想而知，青年人嘅聲音未完全被反映出嚟」，故希望透過歌曲，引起更多人關注青少年議題。

早前教育局局長吳克儉稱學生自殺是欠缺生涯規劃，阿佳直斥「根本就係胡說八道」，認為現時不少人均只著重學生成績，才是最大問題。Boyz Reborn上月推出新歌5**，歌詞提及一眾學子辛酸，「千方百計要達五星保證」、「要記住真正校訓　考得好　是我責任」。

主音Jason指，「人人都覺得攞到5**、攞到大學學位，先等於有前途」。各成員現時已屆中五及中六，切身感受到教育制度為學生帶來的壓力。歌詞亦提及「我不信為五星　為了它　需捨去興趣自我」，阿佳認為創作此歌並非要學生放棄學習，而是讓學生反思，「值唔值得為咗拎5**而犧牲所有嘢？」認為學生不應盲目追求成功而讀書，應該為了增長個人知識而讀。

Sam慨嘆，自己喜歡音樂，亦不愛背書，可惜學校供學生所選科目中，不用背書的科目不多，「有啲人想讀嘅嘢學校係無得揀」，亦對學生興趣欠缺支援。Sam只好選擇修讀會計科，及不用背書的視藝科，但最終亦「drop」了會計。

主音之一的阿蘇亦直斥香港教育制度變態，填鴨式教育令學生單方面接收知識，「為咗DSE沙紙考得靚而讀書，有無學生真係想讀？」阿蘇又指，曾觀看有關芬蘭的紀錄片，認為芬蘭學生課業不多，閒暇亦不用如香港學生般需補習及補課，學生可以學習自己喜歡的技能，例如滑雪及游泳等，生活比香港學生更多姿多采。

「人生如果過於保守亦都難以精彩，過於守舊呢個社會亦難以轉變，要有豁出去嘅一份勇敢。」

Ian亦補充，現時問題在於學生只為取得5**，而並非真的對知識有渴求，「我哋唔係為考得唔好或者偷懶作藉口，而係希望同學唔好因為讀書而氣餒」，強調歌詞是指向制度，而並非抹黑知識。

記者到達Boyz Reborn的Studio時，不少成員正埋頭趕功課。作為將要面對公開試的學生哥，談及現時教育制度，各人更認為要改變一眾「大人」的價值觀，反問「點解拎到大學學位先叫有前途？」Ian指，不少港人心態保守，認為穩定才是最佳生活，認為大人思想要改變，「死讀書其實都未必一定啱」。