【文理之爭】理科生「文科好無謂」論 王貽興:悲哀的香港人

撰文:
最後更新日期:

如何用一句話激嬲文科人?

近日,名校Secrets facebook一篇文章,激起網民熱議。發帖人自稱是女校理科生,認為「讀文科好無謂」,質疑讀文學賞析無法養家,引起不少人反擊:「讀生物化學物理以為自己好勁?」

《香港01》訪問作家王貽興、語言專家Ben Sir,前者形容學生言論代表「悲哀的香港人」,後者則認為想做領袖,必須文理兼備!

不少中學生都要為選科煩惱,近日有理科生在網上發帖指,讀文科好無謂,引起不少網民熱議。(資料圖片)

最近名校Secrets facebook專頁有一篇文章,發帖人自稱是女校理科學生,認為讀文科好無謂,當中批評香港中學課程—歷史及文學流於片面,甚至質疑學習的文學賞析能否「餵飽一個人、養活一頭家」,引起不少網民大反擊,捍衛文科。

該理科生質疑,讀文學賞析無法養家。(名校Secrets facebook)

此帖一出,引起不少人留言捍衛文科。部分網民揶揄發帖人:「你讀完中學chem咪一樣做唔到科學家!」甚至掀起文理之爭,有網民大反擊:「作為一個文科生,我認為理科讀黎真係好無謂,讀生物化學物理以為自己好勁?」

本網將該文章歸納,得出四大要點:

一、文科唔等於文化

中華民族5000年歷史,背後嘅文化同價值觀,有好多可取之處,忠孝仁義謙禮讓尊師重道敬老……係唔係一定要讀文學同歷史先可以學到並實踐?唔係。

英國以及歐洲各國背後亦有好深厚嘅文化,讀englit(英國文學)世史嘅同學又識幾多?

二、文科讀來冇咩用

lit(文學)呢一科只係不停賞析唔同年代嘅作品,分析佢地嘅寫作技巧等。試問呢啲嘢分析完有咩用?可唔可以餵飽一個人,養活一頭家?

三、課程不深入

DSE呢種考試制度下,呢啲所謂賞析都要用一定格式去做,同學根本就唔係學識點樣去欣賞一件作品,而係學識點樣按DSE要求去分析一件作品。

華夏文族5000年歷史,用短短3至6年去讀,只會是走馬看花,好多重要嘅嘢都讀得唔深入,好多重要嘅野都忽略咗冇讀。

世史世史,其實只係讀緊歐美某些強國嘅歷史,讀完世史就以為自己對世界嘅歷史有認識嘅同學,未免太天真!

四、否定文學價值

文字係一個工具,令人類可以記錄發生過嘅事,為人類文明發展作出貢獻。但文學其實只不過係攞文字來玩,將文字砌來砌去,砌到好多人鍾意嘅組合就會成名著。

作家王貽興認為,世上任何一科都有存在價值!(資料圖片)

王貽興:文科被貶無用 因功利角度衡量

畢業於中大中文系的作家王貽興接受《香港01》訪問,對於「讀文科冇用」的言論,他形容此想法出於「悲哀的香港人」。他續稱,文科被貶為無用,只因香港社會以功利、短視的角度衡量。他強調,外國從事文藝創作者,一樣可以發達。

至於文科經常被貶為「搵唔到食、養唔到家」,他則認為,文科藝術沒有即時搵錢作用,但可以開闊視野,令個人感受變得不一樣。「世上任何一科都有存在價值,如果每個人都想發達,全香港應該只有擦鞋科、炒樓科!」

他期望該名理科生可以多閱讀書籍,增加自己的見聞,同時亦希望大家明白,想在社會立足,全是視乎個人能力,而非被科目困死自己。「可能有人讀完理科走去做作家,又或者文科人對治亂興衰有感悟,選擇從事商科,科目並唔代表你永世都要去做嗰樣嘢!」

Ben Sir的被書被評為第二類物品。(資料圖片)

Ben Sir:溝通在於文科 領袖需文理兼備

中文大學中國語言及文學系高級講師、語言學家歐陽偉豪(Ben Sir)回覆《香港01》指,明白該理科同學的心情。他解釋,讀理科的人能解決世界問題,例如環保、醫學專才,讀文科沒有以上作用,但他強調大家可從語言、歷史科得到更多啟發,擴闊思維。「文科嘅重要作用係同人溝通,如果科學家文史哲兼備,就係領袖材料。」他又指,該理科生正是學過語文,才懂得寫這篇帖文!

讀文學賞析無法「餵飽一個人,養活一頭家」?Ben Sir則反駁,看看坊間補習天王一樣可以成名。他笑稱,自己在中學生涯都是選修理科,後來因「讀唔掂」,大學時才選修文科。問到過去有沒有擔心自己的出路?Ben Sir則淡然說沒有,當時由理科轉文科,都只是在乎自己的興趣及能力。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。