敝婊絕對認為林鄭喺佢呢年紀絕對算keep得好，需知女人擔起半邊天唔係易事（雖然佢連八達通都唔識用）。不過睇佢今日個妝同昔日個妝，感覺就好似結婚前後。留意返，結婚前係今日個妝，結婚後係平時個妝，我係佢老公應該會當今日係第二次婚禮。

文：19 beauty bitch

自問平時唔算係政治狂熱之徒，但絕對唔係討厭政治之輩。呢排特首選戰閙到興恰恰，老老豆豆，既然自己冇票選，又唔係收咗錢，咁肉緊把托咩！但今日睇完林鄭個造勢大會後，唔睇由自可，一睇把幾火！你個人離地，柒幾次香港人就唔記得，港豬們出名善忘㗎啦！但你一而再，再而三，用一啲以為好貼地，但其實離地到喊嘅方法，搞到自己人唔似人，鬼唔似鬼，感覺好似對住班恩客賣笑，好悲涼。

敝婊唔係政情中人，未夠班去評價林鄭今日嘅表現，不過就佢今日個妝容同外表都有少少資格講幾句。戴定頭盔先，敝婊絕對認為林鄭喺佢呢年紀絕對算keep得好，需知女人擔起半邊天唔係易事（雖然佢連八達通都唔識用）。不過睇佢今日個妝同昔日個妝，感覺就好似結婚前後。留意返，結婚前係今日個妝，結婚後係平時個妝，我係佢老公應該會當今日係第二次婚禮。林鄭應該（除非唔係）為今日個造勢大會，特登請咗個新化妝師。

睇返佢以前啲相，眼皮明顯下垂，加上佢又內雙眼皮，即使畫咗內眼線雙眼都好似無乜神。今日佢就好明顯地畫咗超粗嘅內眼線，喺電視度睇雙眼明顯有神得多，喂記住佢仲係戴住眼鏡喎！

另外林鄭皮膚明顯柔滑咗，同以往有啲凹凸嘅皮膚頗有分別。瑕遮功夫做得幾足，而且個妝夠貼，又勁打陰影，有提拉緊緻作用，令佢個人望落年輕咗少少。

仲有條眉，之前條眉只係去到眼角，一望就覺得好惡；今次就畫到去太陽穴（誇張手法:P），感覺變得好柔和同更有女人味，以佢嘅面型嚟講，其實好襯彎月眉，唔明點解平時要日日畫條八婆幼短眉，個人更有氣勢啩。

最後到佢個髮型，望落同平時好似冇乜分別，但明顯更有層次。個髮型師可能用咗離子夾幫佢夾曲咗部分頭髮，造出輕微蓬鬆感。嗱個髮型師就夠晒貼地啦，知道今年髪型流行蓬鬆感，襯落佢度又唔算太突兀，林鄭下次應該畀多啲tips佢。

睇落好似讚緊佢，唔好忘記，佢差唔多全程都企喺spotlight之下，如果喺現場見到佢真人應該會以為佢係畫皮上身。「女為己悅而容」係冇錯，但錯在before同after分別太大，令人覺得佢喺度扮young扮貼地，你覺得梁愛詩拉咗皮之後會成個唔同晒咩？妖咪又係粉皮一條！

講完個妝，就輪到衣著打扮。通常嚟講，妝應該襯返個打扮。不過其實依林鄭今日打扮嚟睇，其實佢素顏都應該冇乜人留意。上網見到有人話佢件衫同會展保安制服撞到應一應，咁都算啦。佢個look抄足Steve jobs，以一身素色T-shirt造型示人，特登扮young，已經夠晒怪；又九唔搭八用天藍色襯粉紅色，貪望落面色好啲吖？唔講以為入面嗰件係Heattech用嚟保暖咋！

19才子陶傑之前講過，林鄭形象一向向陳方安生「致敬」，冇人話佢錯喎，望落優雅又有女強人感覺，幾襯佢吖。而家180度轉變，敝婊只覺得佢好似以前喺學校啲所謂「乖」學生，為討好老師成日做2.5向老師報串，之後又想同啲同學扮friend融入返個圈子度，諗起啲咀臉就想作嘔。都係嗰句，前後差別太大，實在叫人消化不良。想打破同年輕人隔膜？扮young呢招唔work㗎！一次不忠，百次不容，當年咁勇武，頭也不回拆天星碼頭又唔見你聽下年輕人意見！

其實講咁多，重點只有一個，就係你柒，做咩都係柒，原罪嚟㗎。佢做少啲柒嘢，已經夠晒功德無量。（oh sorry，林鄭係信上帝嗰喎。）

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）