【廢青求職攻略】如何「請假見工」不被老細發現？
同大部分人傾轉工問題，佢哋都表示其中一個煩惱係「唔知點請假見工」，我當你一個月send 10封求職信出去，當中有3份工打嚟叫你見都幾頭痕：點樣一個月請3次假呀？
見多幾份工 比較少中伏
基本上，由薪酬待遇嚟講，跳槽一定係利多於弊，我好少聽人講跳槽係減人工嘅，就算係，都係因為新工有特殊吸引力先會減薪都去。但人係有感情動物，除咗錢，每日返工開唔開心、有無滿足感、歸屬感都好重要，好多人唔敢跳槽就係怕而家唔開心，新工可能更加唔開心。
有得揀，先至係老闆，我就鍾意同時拎幾個offers喺手慢慢揀的，比較下地點、office裝修、人工福利、同上司夾唔夾等等，絕對有效減少跳錯槽嘅機會。
用最少時間 見最多份工
同大部分人傾轉工問題，佢哋都表示其中一個煩惱係「唔知點請假見工」，我當你一個月send 10封求職信出去，當中有3份工打嚟叫你見都幾頭痕：點樣一個月請3次假呀？年尾狂sick leave，你當老闆傻㗎咩。如果你可以好有型咁「係呀我係見工」就無事，但如果想靜雞雞，我惟有將所有interviews group埋同一日見！
最多嗰日試過見3份工：9:30am、2pm、5pm
呢幾個時間係最無懈可擊：
最想做嗰份安排喺2pm，因為朝早interview完，可即時檢討自己對答有咩不足，又可知道interviewer對自己份CV有咩係感興趣的。而5pm嗰份，應該係三份之中最不感興趣的，因為你已經好累，發揮一定差啲，只係去睇下／留多個選擇畀自己。
有乜可能咁巧合，三份工都約你同一日？
係囉，個世界邊有咁多巧合，當然係靠你自己去安排啦。打得畀你安排interview嗰個，通常都係小薯級，上篇講過，HR小薯好少影響到你見工結果，所以千祈唔好怕佢（唔係叫你寸佢呀）。工揀人，人揀工，「約」時間係雙方嘅，唔需要佢話幾時就幾時，但最緊要有禮貌。
HR小薯：「你好呀陳小姐，我哋係ＸＸＸ公司打嚟，收到你封CV想安排你見工。你聽日下晝3點得閒嗎？」
我：「唔好意思呀，聽日我唔得。」
HR小薯：「下咁……但我哋安排好晒喇喎，又要book房嗰啲……」
（係呀，佢哋通常都唔會咁順攤，我甚至被對方嚇過，話如果聽日唔得就可能之後都安排唔到。傻的嗎？你記住，對方／對方老闆都睇咗唔少CV先睇中你，再講，好多時都係HR已經將你份CV比咗department head睇，你未來老闆覺得啱睇先叫佢打嚟，所以HR小薯都要交差，佢唔敢亂來的。）
我：「但我聽日真係唔得呀，公司有個好重要嘅會要開，不如星期四？你哋係咪下晝方便啲？我下晝OK呀！唔好意思。」
（我重申，保持禮貌好重要，你懶係遷就佢，佢條氣就會順返。）
然後佢會話「試下安排」。不過你放心啦，多數都安排到，因為係人都知「約」人好煩，你已經先下手為強講咗星期四得閒，佢唔會冒險去約星期五，因為萬一再打畀你，你話星期五唔得，佢又要重做。
如是者，你將所有收到嘅interview都約晒星期四，咁你只需要請一日假，就可以見幾份工，減少被懷疑的機會。
不過請假只係第一步，面試過程除咗比人問，亦要識問人嘢，因為同未來上司夾唔夾都係一份工的重要元素，下篇講吓有咩可以問interviewer。如果你都有見工秘技／疑問，歡迎去我facebook留言分享。
（文章純屬作者意見，不代表香港01立場。）