【廢青求職攻略】職場有無限可能性，試工又何妨？
喺跳槽同唔跳槽之間，無人敢肯定新工一定好過你而家返緊嗰份，一日唔做過，都唔知道新僱主interview嗰陣有無呃你，或者講啲唔講啲。
之前幾篇文章同大家分享過見工要膽大心細面皮厚、多觀察、多發問，好讓自己知道新公司大概係咩情況，從而衡量轉唔轉過去。
但如果你問極都唔放心，最保障嘅方法就係……「試工」！
呢個方法我只套用過喺細公司跳去細公司，大公司合約條款又多又密，我覺得太煩了，唔值得浪費咁多心神。
「試工」意思係喺正式返新工之前，向舊公司請日假去返吓新工，無錯，係正正式式朝九晚六咁做足一日。大拿拿八個鐘，你見到新同事、新上司，連電腦都開埋，咩都感覺清楚啦！係，呢個方法代價較大，同埋唔係人人啱用。
比較適合試工者：
27歲以下（青春永遠係最大本錢，唔多解釋）
對現時份工不滿到盡，但基於某啲原因唔可以裸辭
新舊公司都係細公司
你同而家公司無咩感情，講金唔講心（如果而家老闆係你恩師，同事又係你貴人，你就唔可以咁做喇，因為會背負無良心的罪名）
代價究竟係乜？
就係試啱嘅話，你就要立即向舊公司辭職，補一個月糧拜拜佢條尾，所以首要條件係你願意補一個月人工出來脫苦海。相反，試唔啱基本上無代價，因為入職七日內辭職係可以即日通知的，仲賺咗一日人工。
細公司，有咩事你都可以直接同出糧嗰個講，所有嘢彈性好多，分享一次「拎正牌試工」的經驗……
舊工係一間做event嘅公司，新工係一間超高級婚禮公司，專幫上流社會、明星搞婚禮，一輯婚照十幾萬，所以錢對於新工老闆嚟講根本唔係一回事。我於婚禮公司的interview過程十分愉快，老闆超鍾意我，佢話佢就係要請一個敢破格、有創意嘅人，想我幾日內就跳過去開工，但佢都知我要一個月通知。當時佢欣賞我嘅程度令我有啲擔心，怕佢對我期望過高，開工後我會好大壓力，所以我就話不如試吓工睇吓大家合唔合作到先。
佢同意：
「你平時準唔準時放工？（好準）不如你放工後喺屋企幫我開住工先，人工我計時薪畀你。」
喂咁咪即係同時打兩份工？廢青我唔想迫得自己咁辛苦，所以反建議：
「我喺屋企開工，好難收你錢，我返到去沖涼食飯咁好難計時。如果你真係咁急要我幫手，其實都唔係唔得，我請兩日假過嚟做吓先，OK嘅咪補啲錢早啲離職過嚟囉。」
試工後，我向舊公司辭職，一個月通知期，扣完大假我大約要返多三星期。新老闆等唔切，寧願幫我補錢畀舊公司，結果我一蚊都唔使畀就辭職後兩日過咗新公司了。
如果你覺得返工返得好苦，有時真係問吓自己有無為自己爭取過，點解要逆來順受？遇到不公平點解唔反抗？喺一個地方唔開心點解唔走？就係因為別人一句「唔好整花張CV」？自己情緒重要啲定張CV重要啲？職場真係有無限可能性，就睇你夠唔夠膽開口講，講完之後又夠唔夠行動力去實踐。
（文章純屬作者意見，不代表香港01立場。）