波士成日畀蕉皮你踩，可以點算？
你身邊總會有啲人，去到邊都話同老細唔夾，去邊間公司都係小人當道。同事永遠仆街，上司永遠針對，水機永遠冇人換，全公司由CEO至茶水阿姐都係呃飯食，只有佢一個人出力但又嚴重underpaid……信我，正所謂law of attractions，做到人渣磁石嘅，多數自己都唔好得去邊。
近日薯片叔叔嘅「拒答門」，其實關乎打工仔生存之道。小弟而家已經唔算係小薯，但都做過小薯（除咗富二代誰冇做過？），所以都不妨同大家分享下心得。
先講兩件真人真事。
第一件，發生在我中六嗰年。當時我係小小副社長，Boss當然係社長。社際排球比賽，有人受傷之類，唔夠人。我呢類書生手無縛雞之力，運動嘅嘢，睇同講就叻，當年我場場都係負責打下氣，同埋睇靚女啦啦隊，唔夠人關我乜事。點知Boss忽然夜晚搵我，要我臨危受命。仲「文明地」畀兩個選擇我：一係我落場打，佢做球證（另一場）。一係佢落場打，我做球證。果然有得揀你至係老闆。問題係，當年我勉強識規則，但，點做手勢點吹？完全唔曉。我講我嘅難處，結果Boss黑面發我老脾。最後故事點收科？篇文最尾話你知。不過話定你知社長而家就係大公司的Boss，果然三歲定八十。
第二個故事，發生在我舊公司，反正當事人同我都離開咗嗰間證券行（嚴格嚟講係投資銀行，但不必深究），唔怕講。該人係Sales阿頭，典型的金融Alpha Male，明明識中文但永遠一口流利美式英語。有次該人心血來潮，想搞個石油天然氣嘅投資論壇之類，無啦啦打比我，美式英語連珠炮發叫我負責。咁就哈哈哈，對，我都識股票（唔係點收人工？），但，叫我去搞石油天然氣，即係叫個牙醫幫你開刀生仔咁上下。最後點收科？一樣最尾話你知。
做咗十幾年嘢，幾十年人，呢兩件係我僅有疑似硬食Boss，似乎畀人放蕉皮嘅cases，都好似冇第三單。
波士贈蕉皮 需分清故意定無心
薯片叔叔嘅「拒答門」，有人話冇人跣佢，只係佢自己伸個頭出嚟，向北大人表忠，「我都唔介意千夫所指的」。亦有人話佢係比CY之類跣咗一劑應嘅。本文無意做神探，真相可能永遠無人知。若係前者，冇乜好討論。所以我哋討論後者，即係，職場上被Boss放蕉皮，可以點？
記住，Boss唔一定係直屬上司，邊個話事未必睇個org chart就睇到。上面故事二，入面嘅Sales阿頭一樣唔係我直屬上司，但就可以將我搓圓撳扁。同樣道理，睇宣誓都知，薯片叔叔同CY真正嘅Boss在北面。薯片叔叔既然有意挑戰CY選特首，咁佢哋關係又唔完全只係Boss同小薯。
Boss畀蕉皮你踩，可以點？可以分開無意同有心兩種情況。跣人都有無意？係有嘅。可能想試你（聽落好好笑，但真係有咁嘅人）。可能大家觀點不同，佢為你好畀你試多啲嘢，畀機會你立功快啲上位，醒隻好牌畀你但你以為佢跣你。可能只係唔小心，唔記得咗。「吖Ivan原來你唔識打排球？原來你唔識天然氣？唔記得咗添」。
點分有心無意？無心嘅蕉皮，可能都好跣，好痛，但唔會不停咁重覆。我做Boss都有無心跣過人。但好嘅Boss，跣完人應該會知道自己錯。當住咁多人面認錯就冇乜可能，但佢可能私下同你表達歉意，可能年尾寫好你份appraisal，可能下次佢跣都搵塊細啲嘅蕉皮，或者跣第二個。
遇到無心嘅蕉皮，唔好放在心，反正到你做Boss，都會無心跣到人。撻低咗惟有當係磨練，正所謂The worst situation is the best training。又，呢句嘢又係社長話我知的。都話三歲定八十。
好，咁如果三日一小跣五日一大跣嘅，就應該係有心了。占士邦片話齋：
Once is happenstance. Twice is coincidence. Three times, it's enemy action.
遇到呢種情況，可以點？唔好搵蕉掟我。答案係，硬食，或者走人。
對，好Boss係唔應該不停咁畀蕉皮人踩的。遇到咁情況，你嘅職場生涯盞紅燈紅過薯片叔叔。得閒好上多啲求職網站，約下headhunt飲咖啡。你可以閃避，投訴，但十居其九搞到咁情況嘅，最後你都係返番去硬食或走人呢兩條路，不如慳番啖氣。
成日遇人渣嘅 自己都唔好得去邊
話說回頭，你身邊總會有啲人，去到邊都話同老細唔夾，去邊間公司都係小人當道。同事永遠仆街，上司永遠針對，水機永遠冇人換，全公司由CEO至茶水阿姐都係呃飯食，只有佢一個人出力但又嚴重underpaid（有統計顯示香港人普遍覺得自己嚴重underpaid）。正如你身邊總有個朋友投訴情場永遠遇人不淑，個個都係騙子，好男人唔知死晒去邊。爭在未好似《美人魚》嘅張雨綺咁狠狠講一句：「我副架撐咁齊，你竟然當我臭四？」
信我，正所謂law of attractions，做到人渣磁石嘅，多數自己都唔好得去邊。你睇成功嘅人，金融好運動好藝術好，十個有十個都係話work with the winners，欣賞身邊人嘅付出，冇人鬧上司唔識貨下屬不知所謂隊友拖累我我懷才不遇。
上少啲Facebook，蒲少啲討論區，反正職場上冇人care你感受。就算你啲網友會，你月尾供樓水電煤氣都唔會care你爽唔爽，你不妨叫你啲網友幫你交。
庸才先成日「唔好彩」。平時裝備自己，有能力嘅，包你唔會再成日唔好彩畀人跣。就算跣咗都冇咁痛，快啲起到身。畢竟成功上到位嘅，邊個冇比人跣過？邊個冇食過死貓？你覺得政客CEO係善男信女？年中不知幾多人想C朗拿度走樣可以恥笑佢。但佢只回應一句Your love makes me strong，your hate makes me unstoppable。型呀可？你都可以咁型，你係C朗拿度咁好波咪得。人哋肯定冇得日日食抹茶蛋糕。
最後講埋兩個故事嘅結局。
故事一，第二日我硬着頭皮，諗住走堂去圖書館搵排球規則書。對，我係稱職嘅下屬。然後社長搵我，當然冇同我道歉，但話搵咗第二個了。當日賽事我繼續食花生睇靚女。See？好Boss唔會同你講對唔住，但會知自己做錯。
故事二，都係差不多，我硬着頭皮甚至硬着包皮，速成石油天然氣知識，就去搞。當然搞到一鑊泡，Sales Head都有循例出個電郵多謝我，但之後繼續畀蕉皮我踩，玩到謝，最後我就走人。
對，遇到不停跣你嘅衰Boss，除咗裝備自己搵工轉，都冇乜可以做。畢竟既然你都認定佢係一個賤人，你仲work under佢？ 除非你自認自己冇料到。咁就唔好怨天怨地了。打工唔係睇TVB或睇波，唔會一路鬧一路睇好過癮。
（文章純屬作者意見，不代表香港01立場。）