【LANCÔME事件】讓關公死十次的5大錯處
Lancôme 單嘢，真係可以成為關公界經典案例。
一條環時微博加幾個回應，搞到一間公司又要澄清又道歉，漏夜仲要取消成個Event，咁樣做結果帶來啲咩呢？
▌HOCC Fans 繼續鬧爆 ▌
▌強國玻璃心繼續心酸堅決扺制（聲稱） ▌
▌撐HOCC 政治／性取向／支持自由言論／其他理念的香港人罷買（聲稱） ▌
▌反HOCC政治／性取向用家又聲言對品牌失信唔再支持 ▌
係，我明喎，大陸市場呀嘛，香港係「difficult market」呀嘛，即係同成個大餅比，就算輸哂上面四點，都仲係講緊幾百億人仔生意喎，為保大茶飯，有啲「犧牲」都在所難免啫。
之但係咁，只係因為數十條微博轉載同埋所謂「權威」內地喉舌，就去評估自己品牌會得失成個大陸市場，高層同Marketing Team究竟做過乜？
好啦，假設HOCC真係咁災難，會令十幾億人都震怒，咁你要止血，咪用返強國人platform去做，例如覆返微博咪算，你又做咩面向返香港人喺FB出個咁大嘅繁體聲明呢？
大哥，你條PR teaｍ如果集體問責離職，將來都要食飯㗎，點寫呢單嘢落resume先？我都唔識計你死幾多樣嘢。
- 1 -
最初最初，搵星做宣傳（就算唔係代言人），都已經知HOCC撐佔中／出櫃啦係咪？你自己品牌亦都好清楚要食大陸個大餅，咁喺品牌形象部分係點評估？有無考慮過佢符唔符合強國對「正面形象」嘅要求？
- 2 -
衰咗，畀環評睇上咗，到底點評估後續、傷害同處理手法？可以想像嘅係，某高層可能一見到「聖旨」，即刻叫人做嘢，draft道歉澄清之類，呢個時候，有無人夠膽講句人話：「其實強國人口裏說不，身體卻很誠實，說好的罷買日本貨呢」？又或者認真計算搵HOCC嘅傷害性呢？有冇諗過其他可行方法，例如在內地或韓國另找代言人之類去分散視線等？
- 3 -
好啦，老細話一定要道歉，打工無 say，咁如前述，喺微博覆完咪算，做咩要喺FB打聲明自爆？官方聲明等同官話，無人鍾意睇，而且在港傳透率太高，本來唔知都變知，無事都變有事。至於內容中英文質素固然差，「純音樂分享」呢啲用字更係欲蓋彌彰，低檔次道歉只係令人更反感。結果又衰埋。
- 4 -
危機無止蝕仲蔓延，咁危機管理嘅人員有冇做好分析，例如香港人對相關議題（政治／性向／公平／中港矛盾等）嘅關注、好感度，去做相應嘅回應呢？面對大量FB上嘅查詢同指罵，又有冇即時處理呢？乜都無。
- 5 -
反感度持續高企。最後重蹈覆轍，發出官方聲明第二擊，不從根本內容解決問題，選擇取消演唱會徹底同 HOCC 割蓆，嚴格來講，即係選擇同有反應嘅人割蓆。去到呢度，危機明顯係會升級，品牌除咗要承受嗰啲抵制罷買之外，仲有各種對品牌不利好嘅消息會蔓延，得罪網民喎，仲唔起你底咩？
講真，死上述一樣都夠炒魷。我覺得更重要嘅係，你千道歉萬道歉，就欠了 HOCC。傷害別人後道歉係基本禮貌，唔該。
各位同業，件事唔係無前車可鑑架，D&G 好 Laneige 好，都曾經因為「中港矛盾」四隻字喺 PR 衰過，人類總係要重複犯錯，因為太多人唔識喺歷史上汲取教訓，發生方式唔同啫，本質一樣架，就係你當香港市場係咩囉。
自由行係帶旺定扼殺本港經濟，真係人言人殊，不過我就幾肯定，喺自由行最風光呢幾年，成就咗一班業界懶人。無他嘅，當日日有人過關送錢畀你使，買金器名牌往往以數十件為單位交易，飯來張口，一來一回，就坐擁佣金十幾個，畀着係你，你都懶得諗咩市場營銷同策略啦，總之記住將繁體字轉做簡體字就得。
結果，咪唔再識變通，凡事都只顧向內地靠攏，有危機唔曉轉身射個三分波，只求（以為）保得住塊大餅囉。
小弟同徐緣先生一樣，希望呼籲更多有 guts 品牌未來可以找何韻詩合作，但係我覺得以下嘅機構都應該諗諗搵佢代言：
▌本地奶粉尿片商 ▌
▌幼稚園／小學 ▌
▌海洋公園／迪士尼 ▌
咁就真係皆大歡喜囉。
（本文純屬作者意見，不代表香港01立場。）